खोज

बुधबार बिहानै बुटवलमा भएको बीभत्स हत्याको घटनाले आम बुटवलवासीलाई अत्यन्त दुःखी बनाएको छ । बुटवलवासी मात्रै होइन, मुटु नै हल्लाउने उक्त घटना थाहा पाउने हरेक नेपालीलाई चिन्तित समेत बनाएको छ । बुटवलमा एकपछि अर्को गरी लगातार भइरहेका यस प्रकारका अपराधजन्य घटनाले चुनौती दिएको छ । एकाबिहानै तीन तीन जनाको बीभत्स हत्या चानचुने कुरा र विषय होइन । मानिसहरूमा पछिल्लो समय बदलाको भावना र अपराधजन्य मनोबृद्धि बढ्दै गएको यो घटनाले पुष्टि गरेको छ । आफ्नै पूर्व पत्नी र निर्दोष साना नानीहरूमाथि क्रूर र अत्यन्त बीभत्स तरिकाले हेम्मर र चक्कु प्रहार गर्नु मानव सभ्यतामाथि ठुलो चुनौती हो ।

यसअघि आफ्नै दाजुलाई हत्या गरी टुक्रा टुक्रा पारेर लास समेत गायब गर्ने जुन प्रयास उनले गरे, उनमा मानसिक समस्या समेत थियो कि भन्ने प्रश्न समेत उत्पन्न भएको छ । अर्कोतर्फ यस प्रकारका सङ्गिन अपराधका घटनामा जोडिएका र जेलको सजाय पाएका अपराधीलाई आम माफी दिनु अर्को ठुलो गल्ती थियो भन्ने कुरा यो घटनाले पुष्टि गरेको छ । सङ्गिन अपराधका घटनामा जोडिएका मानिसलाई माफी मिनाहा दिनु गलत हुने रहेछ भन्ने कुरा यसअघिका धेरै घटनाले पुष्टि गरिसकेका छन् । कैद माफी पाएर जेलबाट छुटेकाहरूले अर्को ठुलो अपराध दोहो¥याउने गरेको धेरै घटनाले पुष्टि गर्दै आएका छन् । फेरी पनि नेपाल सरकारले असल आचरणको नाममा र धेरै कैद भुक्तानको नाममा यस प्रकारका अपराधीलाई छोड्नु हुँदैन भन्ने कुरा यो घटनाले पुष्टि गरेको छ । अतः यो विषयमा नेपाल सरकारको पनि ध्यान जाओस् ।

पछिल्लो समय अपराधका जघन्य घटनामा वृद्धि भइरहेको छ । गत वैशाख महिनामै पनि बुटवलको प्रगति नगर क्षेत्रमा भारतीय नागरिकले स्थानीय टिका विष्टमाथि दिउँसो गोली प्रहार गरी फरार भएका थिए । ती भारतीय नागरिक अहिलेसम्म पक्राउ परेका छैनन् । यसमा पनि बदलाको भावना जोडिएको छ । आफूले मन पराएको नाममा विवाह गर्न अस्वीकार गरेपछि हत्याको योजना नै बनाउनु गम्भीर अपराध मनोवृत्ति हो । यस प्रकारका मानिस समाजका लागि कलङ्क हो । बदलाको भावना राख्नु र आफ्नो उद्देश्य पूरा नभएकै नाममा ज्यानै लिने दुस्साहस गर्नुको पछाडि अपराधको मनोवृत्ति देखिन्छ । अबको दिनमा समाजमा हुने यस प्रकारका घटनाबाट पाठ सिक्नु जरुरी छ । यस प्रकारका घटनाले नेपाली समाजलाई विक्षिप्त बनाएको छ । यस प्रकारको समाचार सुन्दा अप्रिय र पत्याउनै गाह्रो पर्छ ।

निश्चित रूपमा यी प्रश्नहरू अहिले सबैको मनमा तेर्सिएको छ । देशका विभिन्न स्थानमा दोहोरिइरहेका यस प्रकारका घटनाले राष्ट्रिय अन्तर्राष्ट्रिय रूपमै नेपालको बदनामी हुने गरेको छ । प्रहरी प्रशासनले यस प्रकारका जघन्य अपराधका घटना नियन्त्रणमा गम्भीर चासो दिनु जरुरी छ । साथै यस प्रकारका घटना बेलैमा रोक्न सकिने विषयमा पनि छलफल आवश्यक छ । मानव सभ्यतालाई चुनौती दिने यस प्रकारका त्रासदीका घटना त छँदै छ, त्यसमाथि बलात्कार, अपहरणका घटना धेरै बढेका छन् । कु–संस्कार र धर्मको नाममा आडम्बर फैलाउने, प्रताडित गर्ने, निर्ममता प्रदर्शन गर्ने क्रम बढ्दै गर्दा यस्ता घटनामा संलग्नमाथि कडाभन्दा कडा कारबाही गर्नु जरुरी छ ।

दण्डहीनताको संस्कृतिले जरो गाड्दै गएको कारण नै जसले जे गरे पनि हुन्छ भन्ने मानसिकताका कारण अपराध दिनानुदिन बढ्दै गइरहेको छ तर त्यसप्रति सरकारको ध्यान जान सकेको छैन । हिंसाको डरलाग्दो स्वरूपले मानव क्रूर बन्दै गएको देखाउँछ । यस प्रकारका घटनाको एउटै समाधान कडा कानुन नै हो । अव सरकारले अपराधको विकसित घटनाक्रम नियन्त्रणमा ध्यान दिनु जरुरी छ । जघन्य अपराधका घटनामा संलग्नलाई कडा कानुन बनाएर आजीवन कारागारमा राख्नुपर्दछ भन्ने कुरा बुटवलको बुधबारको घटना र यसै प्रकृतिका अरू धेरै घटनाले पुष्टि गरेका छन् । अतः यो विषयमा सरकारले नयाँ ढङ्गले सोच्नु जरुरी छ ।