खोज

सुर्खेत,१५ जेठ ।

कर्णाली प्रदेशका मुख्यमन्त्री यामलाल कँडेलले कर्णाली प्रदेशका मुख्यमन्त्री यामलाल कँडेलले व्यक्तिका कमीकमजोरीलाई गणतन्त्रको असफलतासँग जोडेर हेर्न नहुने बताएका छन् । उनले कुनै पनि कोणबाट गणतन्त्रमाथि प्रश्न उठाउन नहुने बताए । १८ औँ गणतन्त्र दिवसको अवसरमा शुभकामना व्यक्त गर्दै मुख्यमन्त्री कँडेलले पुरानो व्यवस्थातिर फर्काउन खोज्ने असंवैधानिक कदमहरू कदापि स्वीकृत नहुने दाबी गरे । कँडेलले इतिहासको गतिलाई कसैले पनि पछाडि फर्काउन नसक्ने बताएका छन् ।

‘जुनसुकै शासन प्रणालीलाई संस्थागत हुन, सुदृढ बन्न र त्यसले परिणाम दिन निश्चित समय लाग्न सक्छ । शासन प्रणाली विकासका क्रममा कमजोरीहरू देखा पर्न पनि सक्छन् । तर टीकाटिप्पणी र कमीकमजोरीहरूलाई व्यवस्थाको असफलतासँग जोड्नु हुँदैन,’ शुभकामना सन्देशमा मुख्यमन्त्री कँडेलले भनेका छन् ।

लोकतान्त्रिक गणतन्त्रलाई सबल तुल्याउन सामाजिक न्याय, सुशासन र समृद्धिका तीन वटै आयामहरूलाई समुचित सन्तुलनका साथ अगाडि बढाउनु अहिलेको प्रमुख आवश्यकता भएको उनको ठम्याई छ । जनतालाई केन्द्र बिन्दुमा राखेर जनताको इच्छा र जनताका लागि सञ्चालित हुने अभ्यासले नै गणतन्त्रलाई थप सुदृढ र परिपक्व बनाउने उनको भनाई छ ।

गणतन्त्र दिवसले राष्ट्रिय सार्वभौमिकता‚ स्वाधीनता र राष्ट्रिय एकतालाई अझ सुदृढ गर्दै सामाजिक न्यायसहितको समृद्धि हासिल गर्ने बाटोमा अघि बढ्न मुख्यमन्त्री कँडेलको आग्रह छ । व्यक्तिको जन्मका आधारमा श्रेष्ठता तय गरिने प्रणालीलाई नेपाली जनताको सङ्घर्ष, त्याग र बलिदानबाट हरेक नागरिक समान हुने प्रणाली स्थापना हुनु गणतन्त्रको प्रमुख विशेषता भएको उल्लेख गर्दै मुख्यमन्त्री कँडेलले युगान्तकारी परिवर्तनको आयामलाई सामाजिक आयामसँग जोडेर समुन्नत प्रणाली विकास गर्न सकेमा मात्र गणतन्त्र दिगो बन्न सक्ने बताएका छन् ।