खोज

काठमाडौँ ।

छिमेकी मुलुक भारतमा पुनः कोरोना भाइरसको संक्रमण तीव्र हुँदै गएको छ। भारतको स्वास्थ्य तथा परिवार कल्याण मन्त्रालयका अनुसार देशभर हालसम्म कोरोना संक्रमितको संख्या १ हजार ९ पुगेको छ।

सबैभन्दा बढी संक्रमण केरलामा देखिएको छ, जहाँ संक्रमितको संख्या ४३० पुगेको छ। त्यसपछि महाराष्ट्रमा २०९ र राजधानी दिल्लीमा १०४ जनामा संक्रमण पुष्टि भएको छ।

बीबीसी हिन्दीले सार्वजनिक गरेको विवरणअनुसार अन्य राज्यहरूमा पनि संक्रमण फैलिएको छ — गुजरातमा ८३, तमिलनाडुमा ६९, कर्नाटकमा ४७, उत्तर प्रदेशमा १५, राजस्थानमा १३, पश्चिम बंगालमा १२, हरियाणा र पुडुचेरीमा ९–९, आन्ध्र प्रदेशमा ४, मध्य प्रदेशमा २, तेलंगाना, गोवा र छत्तीसगढमा १–१ जना संक्रमित भेटिएका छन्।

यता, कर्नाटकका स्वास्थ्यमन्त्री दिनेश गुन्डु रावले स्थिति गम्भीर नभएको दाबी गरेका छन्। “भारतमा रिपोर्ट गरिएका कोभिड–१९ का केसहरू हल्का छन्,” उनले भने।

उनले महाराष्ट्र लगायत केही राज्यहरूमा भएको मृत्युबारे टिप्पणी गर्दै ती कोभिडसँग प्रत्यक्ष सम्बन्धित नभई अन्य रोगहरूका कारण भएको पनि उल्लेख गरे। तर सतर्कता आवश्यक रहेको बताउँदै उनले भने, “हामी परिस्थितिको निगरानी गरिरहेका छौँ। आवश्यक परामर्शहरू पनि जारी गरिएका छन्।” सरकारले संक्रमण हल्का देखिए पनि सतर्कता र आवश्यक सुरक्षा उपायहरू अपनाउन नागरिकहरूलाई आग्रह गरेको छ।