खोज

बर्दघाट, ११ जेठ ।

चुरेको कमजोर भू बनोट । त्यसमा डोजर लगाएर भइरहेको सडक निर्माण । रिटनिड्ड वाल र कल भटको काम अपुरो । निर्माणको काममा ढिलाइ । सडक निर्माणको क्रमको वर्ष । सडकको तलमाथि फाटिरहेको धाँजा । नजिकिँदो वर्षा याम, दाउन्ने सडक खण्डका डरलाग्दा पक्ष हुन् । यसले अबको वर्षामा कति सताउला ? भन्ने अनुमान नै गर्न सकिँदैन ।

शुक्रवार राती परेको वर्षाका कारण दाउन्ने सडक पश्चिम खण्ड अन्तर्गत खोर्सानी खोलामा सडक नै भासियो । पिच गरिसकेको करिब एक सय मिटर बाटो नै उप्कियो । रातको समयमा करिब ११ घण्टा सडक अवरुद्ध हुँदा हजारौँ यात्रु बिचल्लीमा परे । यो सडक खण्डको १४ किलोमिटर दुरी पार गर्न कम्तीमा एक घण्टा लाग्ने गरेको छ । त्यसो त बिहीबार बिहान पनि दाउन्नेको पूर्वी खण्डमा सिमसिमे वर्षाकै कारण गाडी चिप्लिँदा केही घण्टा सडक अवरुद्ध बन्यो ।

सित लहर र सामान्य हिउँदे वर्षामा समेत १४ घण्टासम्म अवरुद्ध बनेको दाउन्ने सडक खण्ड बर्सातको मौसम नजिकिँदै गर्दा सवारी सञ्चालन कसरी होला ? सर्वत्र चासो छ । नारायणगढ–बुटवल सडक खण्डको १ सय १३ किलोमिटर सडकको दाउन्ने सडक खण्ड १४ किलोमिटर रहेको छ जसमा पश्चिम खण्डमा १० र पूर्वी खण्ड ४ किलोमिटर रहेको छ ।

पश्चिम खण्डमा दुवै लेन ५५ किलोमिटर र कम्तीमा एकतर्फी ३५ किलोमिटर पिच भएको छ भने दाउन्ने सडक खण्डमा ३ किलोमिटर सडक पिच भएको छ । दाउन्ने खण्डमा ७ किलोमिटर बाटो जोखिमपूर्ण रहेको छ । पछिल्लो समय रातको समयमा ६ घण्टा सवारी आवागमन बन्द गरेर पहाड काट्ने लगायतका काम भइरहेको पश्चिम खण्डका आयोजना प्रमुख शशाङ्क मिश्राले जानकारी दिए ।

‘अहिले हामी दाउन्ने खण्ड केन्द्रित भएर काम गरिरहेका छौँ, दाउन्ने खण्डको ३ किमी पिच भएको छ र थप ३ किमी ढलानको लागि तयारी अवस्थामा रहेको छ ।’ मिश्रले भने ‘ अहिलेको कामको गति विश्लेषण गर्दा जेठ मसान्तसम्म दाउन्ने बजारदेखि पश्चिम खण्डको पूर्वतर्फको अन्तिम विन्दुसम्म सडकमा सहज सवारी आवागमन हुनेछ ।

दाउन्ने सडक खण्डमा कुल ७२ कल्भर्टमध्ये ६५ वटा निर्माण भैसकेका छन् भने ७ वटा निर्माणको क्रममा रहेका छन् । साना पुलहरू भने सबै सञ्चालनमा आएको मिश्रले बताए । पहाड कटानको काम अन्तिम चरणमा पुगेको र कटानको काम सकिने बित्तिकै सडकलाई ग्रेडिङ गरेपछि पानी पर्दा चिप्लिने समस्याको समाधान हुने उनले जानकारी दिए । उनका अनुसार दाउन्ने बजारदेखि पश्चिम खण्डसम्मको करिब २ किलोमिटर क्षेत्र भने संवेदनशील रहेको छ ।

पछिल्लो समय दाउन्ने पहाड खण्डकै पश्चिम भन्दा पनि पूर्वी खण्डको सडकमा बढी समस्या आउँदा जामको समस्या बढेको छ । दाउन्ने पहाड खण्डको २ तिहाइ बढी सडक पश्चिम खण्डमा रहेको छ, तर पछिल्लो समय पश्चिम खण्ड भन्दा पनि पूर्वी खण्डमा सडक जामको समस्या बढेको छ । पूर्वी खण्डको घिउ खोला क्षेत्र सबैभन्दा संवेदनशील रहेको छ । पूर्वी खण्डमा कुल २९ कल्भर्ट मध्ये २३ सम्पन्न भइसकेको छ र ६ वटा निर्माणको अन्तिम चरणमा रहेको पूर्वी खण्डका सूचना अधिकारी इन्जिनियर शिव खनालले जानकारी दिए ।

पूर्वी खण्डको अधिकांश सडक कम्तीमा एकतर्फी कालोपत्रे गर्ने कार्य सम्पन्न भइसकेको छ । तर केही महिना अघि अत्यधिक भारका कारण भासिएको विनयी खोला पुलबाट सवारी आवागमन हुन नसक्दा सवारीहरू वैकल्पिक मार्ग प्रयोग गरेका छन् तथापि सामान्य वर्षा हुँदा नै खोला बढेर सवारी आवागमन अवरुद्ध हुँदै आएको छ ।

पछिल्लो केहिदिन अघि चोर मारा पुलमा समेत क्षति पुगेपछि पुनः सवारी सञ्चालनमा बाधा पुगेको छ । चोर मारा पुल जेठको तेस्रो सातासम्म मर्मत गरी पूर्ण क्षमतामा सञ्चालन हुने समेत खनालले जानकारी दिए । २०७५ माघ २४ गते ४२ महिनामा कार्य सम्पन्न गर्ने गरी चाइना स्टेट इन्जिनियरिङ कर्पोरेसनले ठेक्का सम्झौता गरी कार्य प्रारम्भ गरेको थियो । करिब ७५ महिना बितिसक्दा समग्रमा ६५ प्रतिशतको हाराहारी मात्र कार्य सम्पन्न भएको छ । पटक पटक म्याद थप गर्दै काम अघि बढाउँदा समेत सडक निर्माणको काम सम्पन्न हुन नसक्दा कहिले सम्पन्न हुन्छ भन्ने अन्यौलता भने कायमै छ ।