खोज

नवलपरासी, ०८ जेठ ।
जिल्लामा खोलानालाबाट खोलाजन्य निकासी रोकिँदा विकास निर्माणका लागि आवश्यक निर्माण सामग्री अभाव देखिएको छ । वन क्षेत्र भित्र रहेका खोलाहरूका खोलाजन्य सामग्रीको निकासी गर्ने अधिकार स्थानीय सरकारलाई नभएको भन्दै सुनवल नगरपालिका स्थित खोला निकासी रोकिदा विकास निर्माणका लागि आवश्यक निर्माण सामग्रीको आपूर्तिमा समस्या देखिएको हो । जिल्ला भित्र खोलाजन्य सामग्री (ग्राभेल, गिट्टी र बालुवा र ढुंगा) निकासीमा अवरोध सृजना भए पश्चात यस्तो समस्या देखिएको निर्माण ब्यवसायीले बताएका छन् । जिल्लाको सिमावर्ति क्षेत्रमा करोडौको सडक आयोजना निर्माणाधिन छन् तर सामग्री अभावले ती सडकका काम गर्ने समस्या देखिन थालेको जिल्ला स्थित निर्माण ब्यवसायी रविन्द्र पटेलले बताए । ती आयोजनाहरूमा स्थानीय सामग्री प्रयोग गर्ने गरि स्टिमेट गरिएका छन्, उनले भने, नजिकका खोलानालाबाट निकासी नहँुदा निर्माण सामग्रीको प्राप्ती गर्न समस्या देखिएको छ । टाढाबाट मगाउँदा ढुवानी लागत बढ्छ । पुनलागत अनुमान गराउन प्राविधिक मान्दैनन, निर्माण ब्यवसायीले कसरी काम गर्ने ? वन क्षेत्रको निर्माण सामग्री यदि डिभिजन वन कार्यालयले स्थानिय तहलाई झिक्न दिँदैन भन्ने आफै झिकेर आपूर्ति ब्यवस्था मिलाउन प¥यो,उनले थपे, अवरोध मात्रै गरेर हुँदैन । ब्यवस्थापन गुर्न पनि सरोकारवाला निकायको दायित्व हो ।

कतिपय अवस्थामा अबैध भण्डारण गरिएका सामग्री केही निर्माण ब्यवसायीले प्रयोग गरी सडक बनाई दिए पनि बिल भुक्तानी माग गर्नका लागि भ्याट बिल पाउन गाह्रो भएको एक निर्माण ब्यवसायीले बताए । भ्याट बिल दिनका लागि निर्माण सामग्री आपूर्तिकर्तासँग खरिद गरेको वा प्राप्तिको स्रोत उल्लेख गरि स्टक मेन्टेन हुनुपर्छ । खरिदै नभई बिक्री बिल बिजक कसरी जारी हुने समस्या देखिएको उनले सुनाए । यसका लागि पनि खोलाबाट निकासी खुलाउन आवश्यक रहेको देखिएको छ । सुनवल नगरपालिका भित्रका करोडौको खोलाजन्य निकासी खोलाउन नगरपालिकाले पहल गर्दा नगरपालिकालाई वनक्षेत्र बाहिरका खोलाजन्य सामग्रीको निकासी गर्न पाउने भए पनि बनक्षेत्र भित्रको अधिकार स्थानीय सरकारलाई नदिइएको डिभिजन बन अधिकृत जिवन पंगेनीले जानकारी गराएका थिए । वन ऐन अनुसार नै स्थानीय सामुदायिक बनहरू मार्फत पनि दैवि प्रकोप उद्वार समितिको निर्णयको आधारमा खोलाजन्य निकासी गराउन सक्ने आधार हुन सक्ने भएकोले त्यसका लागि कार्ययोजना बनाई निकासी गरिने उनले बताएका थिए । उनले नेपालको संविधानको अनुसूची र वन ऐनको प्रावधानबारे जानकारी गराउँदै संविधान र ऐनले बन क्षेत्र भित्रको खोलाजन्य समाग्रिको ब्यवस्थापनको जिम्मेवारी प्रदेश सरकार अन्तरगतको डिभिजन वन कार्यालयलाई नै रहेको देखाए ।

स्थानीय सरकारको रूपमा रहेका गाउँपालिका र नगरपालिकाले खोलाजन्य सामग्री निकासीका लागि वातावरण प्रभाव मूल्यांकन गराउने र सोहीअनुसार जिल्ला समन्वय समितिबाट अनुगमन गराई निकासी गर्ने कार्य विगतमा गर्दै आएको भएपनि अब देखि ती कार्य गर्न नहुने उनको भनाइ थियो । संविधानको धारा ५७ को उपधारा २, धारा १६२ को उपधारा ४, धारा १९७ को उपधारा ३, र धारा२३२ को उपधारा ७ धारा २७४ को उपधारा ४ र धारा २९६ को उपधारा ४ सँग सम्बन्धी प्रदेशको अधिकार सुचीको विषयमा बुदा नं.५ र बुदा नं.१९ अनुसार संवैधानिक अधिकार रहेको देखाएका थिए । बुदा १९ मा प्रदेश भित्रका राष्ट्रि बन,जल उपयोग तथा वातावरण ब्यवस्था उल्लेख भएका छन् । त्यसैगरी वन ऐन को परिच्छेद १७ को विविध अन्तरगत दफा ८८ को उपदफामा बन क्षेत्र भित्रको खोला खोल्सी ब्यवस्थापनको ब्यवस्था अनुसार राष्ट्रिय बन क्षेत्रबाट नदीजन्य पदार्थले बन क्षेत्र, वातावरण, बस्ती, खेतीपातीमा नकारात्मक प्रभाव पार्ने अवस्था पहिचान भई बन क्षेत्र भित्र रहेका खोला खोल्सी खहरेको ब्यवस्थापन गर्नुपर्ने भएमा यस खालको ब्यवस्थापनबाट उत्पादन हुने नदीजन्य पदार्थको संकलन ब्यवस्थापन र विक्रि वितरण डिभिजन बन कार्यालयबाट गरिने छ, भनि उल्लेख गरिएको छ ।

त्यसै गरि उक्त दफाको उपदफा २ मा बनक्षेत्र भित्र रहेका खोला खोल्सी खहरेको ब्यवस्थापनका लागि तयार पारिएको वातावरणीय अध्ययन प्रतिवेदन निर्देशनालयको सिफारिसमा मन्त्रालयले स्वीकृत गर्नेछ र स्वीकृत वातावरणीय अध्ययन प्रतिवेदनमा औल्याइएका सुझाव कार्यान्वयन गर्ने गराउने जिम्मेवारी सम्बन्धित डिभिजन बन कार्यालयको हुनेछ, भनि उल्लेखित छ । यसै गरि सोही दाफाको उपदफा ३ अनुसार खोला खोल्सी ब्यवस्थापन गर्दा संकलित नदीजन्य पदार्थ को बिक्री वितरणको लागि लिइने शुल्क प्रदेश सरकारले तोके बमोजिम हुनेछ र त्यस्तो आय डिभिजन वन कार्यालय मार्फत प्रदेश सञ्चित कोषमा जम्मा गर्नु पर्नेछ, भनि उल्लेखित गरिएको छ ।
सुनवल नगरपालिका भित्रका तुरिया खोलाको खण्ड १, खण्ड २ चुरे भित्र पर्छ । खण्ड ३ र खण्ड ४ मात्रै चुरे बाहिर छ । बिसासय खोला ७ वटै खण्ड चुरे भित्र पर्छ । विसासय कै खण्ड २ क पनि चुरे क्षेत्रमा छ । उक्त खोलाको खण्ड ख २ को ख मात्रै चुरे बाहिर छ । भुमही खोलाको दुई वटा खण्ड चुरे बाहिर रहेको छ । यी खोलाबाट सुनवल नगरपालिकाले झण्डै ६० हजार घनमिटर खोलाजन्य सामग्रीको निकासी गर्न सहमति जुटाउन खोजेको छ । त्यसमा डिभिजन वन अधिकृतले निकासी गर्ने क्षेत्रको जिपिएस कोड हेर्दा वनक्षेत्र पर्ने भएकोले हस्ताक्षर गर्न नमानेका कारण खोला निकसी रोकिएको छ ।