खोज

काठमाडौं ।

 नेपाल राष्ट्र बैंकका नवनियुक्त गभर्नर डा. विश्वनाथ पौडेलले पदभार ग्रहणलगत्तै पहिलो निर्णयस्वरूप नयाँ नोटको तयारी सुरु गरेका छन् ।  अब चाँडै एक हजार रुपैयाँ र ५० रुपैयाँ दरका नयाँ डिजाइनका नोटहरू बजारमा देखिने सम्भावना बलियो भएको छ।

आज बिहान प्रधानन्यायाधीश प्रकाशमान सिंह राउतसमक्ष पद तथा गोपनीयताको शपथ लिएपछि राष्ट्र बैंकमा कार्यभार सम्हालेका गभर्नर पौडेलले यो निर्णय लिएका हुन् ।

हिजो बसेको मन्त्रिपरिषद् बैठकबाट पौडेल गभर्नरमा नियुक्त भएपछि आज बिहान १०:३० बजे उनले  शपथ लिएका हुन् । शपथपछि उनले सिंहदरबार पुगेर उपप्रधानमन्त्री तथा अर्थमन्त्री विष्णुप्रसाद पौडेलसँग भेट गरेका थिए ।

भेटका क्रममा अर्थमन्त्रीले गभर्नरलाई बधाई दिँदै वित्त र मौद्रिक नीतिबीच सन्तुलन कायम गरी देशको अर्थतन्त्रलाई अगाडि बढाउने दिशामा सक्रिय भूमिका खेल्न सुझाव दिए । साथै, मौद्रिक चुनौतीहरूमाथि गभर्नर पौडेलको नेतृत्वमा सार्थक पहल हुने आशा पनि व्यक्त गरे ।

गभर्नर पौडेलले राष्ट्र बैंकको मुख्य जिम्मेवारी मौद्रिक नीति कार्यान्वयनमा रहेको भन्दै त्यसका लागि सुपरिवेक्षण क्षमतालाई अझ प्रभावकारी बनाउने प्रतिबद्धता जनाए। उनले अर्थ मन्त्रालय नीतिगत नेतृत्वमा रहे पनि राष्ट्र बैंक त्यसलाई व्यवहारमा उतार्न निर्णायक ढंगले अघि बढ्ने बताए ।