खोज

चन्द्रौटा, ०७ जेठ ।
कपिलवस्तुको विजयनगर गाउँपालिका वडा नम्बर–२, लोहरौलाका मिर्जा प्रसाद चौधरीमा स्वादेशमै केहि गरौँ भन्ने हुटहुटी छ । यतिबेला अधिकांश युवाहरूको रोजाई भनेको वैदेशिक रोजगारी बनेको छ । तर, उनी भने स्वदेशमै भविष्य खोज्ने आँट गरेका छन् । सानो लगानीमा ‘गाउँमै केही गर्न सकिन्छ’ भन्ने दृढ इच्छाशक्तिले उनीलाई उद्यमशीलताको बाटोतर्फ अघि बढाएको छ । करिब आठ लाख रूपैयाँ लगानी गरेर ३४ वर्षीय चौधरीले योङ्गस फेसन गारमेन्ट प्रा.लि सञ्चालन गरेका छन् । उनी उद्योग सञ्चालन गरेर उदाहरण समेत बनेका छन् । जसमा स्थानीय गाउँका ४ जना महिलाहरूलाई रोजगारी समेत प्रदान गरेको उनले बताए । स्थानीय महिलाहरूका लागि पनि चौधरी आशाको किरण बनेका छन् । उनीहरू बिहान घरको काम सकेर गार्मेन्टमा आउँछन् र उत्पादक बन्ने यात्रामा लाग्छन् । “हाम्रो कामले चुलो चौको चलिरहेको छ ।” उनी गर्वका साथ भन्छन् । स्थानीय बजारमा बिक्री भइरहेको उत्पादित वस्तुभन्दा न्यून मुल्यमा कपडा तयार पार्ने गरी आफूले कपडा उत्पादनमा लागेको चौधरीले बताउँछन् ।

थारु सामुदायको सामान्य घरपरिवारमा हुर्केका उनी स्थानीय स्तरमा विगतदेखि नै सक्रिय छन् । विगत एक दशकदेखि रेडिमेट (फेन्सी) कपडाका व्यवसाय गर्दै आइ रहेका चौधरीले मनग्ये आम्दानी गर्दै आएको उनले बताए । त्यही व्यवसाय गरेका अनुभवको आधारमा हजेरीका कच्चा कपडा ल्याएर स्थानीयहरूलाई रोजगारी दिई आफू पनि आत्मनिर्भर भएको उनको भनाइ छ । सञ्चालक चौधरीले भने– “बजार मुल्यभन्दा कम लागतमा उत्पादन गरि सस्तो मुल्यमा वस्तु उपभोक्ता माझ लैजाने तयारी गरेका छौँ ।” अरूले उत्पादन गरेका वस्तु लगाउने गरेकोमा आफै स्थानीय स्तरमा उत्पादन गरेका कपडाहरू लगाउन आग्रह उनले गरे । स्थानीय उत्पादनलाई प्रोत्साहन दिनुपर्ने जनाउँदै सम्बन्धित निकायको ध्यानाकर्षण हुन आवश्यक रहेको चौधरीले बताए ।

व्यवसायसँगै रोजगारीमा नलागे जिन्दगीमा केही गर्न नसक्ने बताउँदै युवालाई विदेश होइन गाउँघरमै रोजगारीका अवसर जरुरी रहेको उनको भनाइ छ । उनी भन्छन्, “रोजगारी सिर्जना गर्नु मात्र होइन, आत्मनिर्भरता र सीप विकासमा लाग्नु अहिलेको आवश्यकता हो ।” चौधरीको घरपरिवारलाई रोजगारी प्रदान भएको छ भने, स्थानीयको घरको काम सकाएर चुलो चौकोको समेत व्यवस्था भएको छ । उनको घरमा १५ जनाको परिवार छ । उनी शिक्षक समेत हुन् । विद्यालय समय बाहेक अरू उद्योग र आफ्नै गाउँमा रहेको पसलसँगै समाजमा समय दिने गरेको उनको जिकिर छ । चौधरीको गार्मेन्टमा काम गर्दै आएकी सुना थारु भन्छिन्ः “हामी गाउँघरमै रोजगारी पाएका छौँ । घरको काम सकाएर पनि यता काम गर्दै आएका छौँ । आफ्नो खर्चसँगै घर परिवार चलाउन सहज भएको छ । आफू सिकेको सीप समेत सदुपयोग गर्न पाएका छौँ, अत्यन्तै खुसी छौँ ।”