सामग्री खोज्नुहोस्

सिद्धार्थनगर । निजी तथा आवासीय विद्यालय अर्गनाइजेशन नेपाल प्याब्सन सिद्धार्थनगरले आफ्नो वार्षिक कार्य तालिका अन्तर्गत चित्रकला प्रतियोगिता आयोजना गरेको छ। प्रतियोगितामा संस्थामा आबद्ध २६ वटा सदस्य विद्यालयका कक्षा १ देखि ३ सम्मका विद्यार्थीहरूको सहभागिता रहेको थियो ।

सिद्धार्थनगर प्याब्सनका अध्यक्ष कुमार मल्लीले संस्थाले विद्यार्थी, शिक्षक, समाज तथा प्रधानाध्यापकहरूका लागि विभिन्न अतिरिक्त क्रियाकलाप सञ्चालन गर्दै आएको जानकारी दिए । अध्यक्ष मल्लीका अनुसार हरेक व्यक्तिमा विभिन्न प्रकारका प्रतिभा हुने गर्दछ ।

गणित र विज्ञानले तार्किक क्षमता, भाषाले भाषिक क्षमता तथा खेलकुदले शारीरिक क्षमताको विकास गर्ने भए पनि चित्रकलाले विद्यार्थीहरूको सोच्ने शैली, हेर्ने दृष्टिकोण र रचनात्मक क्षमतालाई उजागर गर्न महत्त्वपूर्ण भूमिका खेल्ने उनले बताए ।

यसैबिच, यूरो किड्स भैरहवाकी प्रिन्सिपल तथा आर्ट कम्पिटिसन कोर्डिनेटर प्रतिष्ठा चालिसे मल्लले प्रतियोगिताको विषय मेरो सपना मेरो स्कुल  रहेको जानकारी दिइन्। उक्त विषय अन्तर्गत बालबालिकाहरूले आफ्नो विद्यालयप्रतिको भावना र कल्पनालाई चित्रमार्फत प्रस्तुत गरेका थिए ।

उनले कला र रङहरूले बालबालिकाको जीवनलाई रङ्गिन बनाउनुका साथै उनीहरूलाई भावनात्मक तथा सामाजिक रूपमा जोड्न मद्दत गर्ने विश्वास व्यक्त गरिन्। रङ र चित्रकलामार्फत बालबालिकाको मानसिकता तथा व्यक्तित्व बुझ्न पनि सहज हुने उनको भनाइ थियो ।

प्रतियोगितामा करिब १९ वटा विभिन्न विद्यालयका विद्यार्थीहरूको सहभागिता रहेको आयोजकले जनाएको छ ।