सामग्री खोज्नुहोस्

काठमाडौं । नेपालको आन्तरिक हवाई उडानमा नयाँ वायुसेवा कम्पनी ‘डाँफे एयरलाइन्स’ले सेवा सञ्चालनको तयारी थालेको छ । आक्रामक बजार विस्तारको योजनासहित आएको यस वायुसेवाले आगामी दशैंको अवसर पारेर असोजदेखि उडान सुरु गर्ने तयारी गरेको हो ।

सन् २०२३ मा सिंगल इन्जिन वायुसेवा कम्पनी मकालु एयरलाई खरिद गरेर नयाँ व्यवस्थापनका साथ डाँफे एयरलाइन्सले सेवा विस्तार गर्न लागेको हो । नेपाल नागरिक उड्डयन प्राधिकरण ९क्यान० बाट जहाज ल्याउन नो अब्जेक्सन लेटर ९एनओसी० पाइसकेको यस वायुसेवाले एटीआरको अत्याधुनिक सिरिज एटीआर ७२(६०० खरिद गर्दैछ । सेवा सुरु गरेको तीन वर्षभित्रै ७ वटा एटीआर र थप ३ वटा जेटस्ट्रिम जहाज ल्याएर सेवा दिने रणनीति बनाइएको डाँफे एयरका एकाउन्टेबल म्यानेजर क्याप्टेन कोषबहादुर थापाले जानकारी दिए ।

थापाका अनुसार क्यानबाट एनओसी लिएर जहाज ल्याउने तथा पाइलट र कर्मचारी व्यवस्थापनको प्रक्रिया पनि सुरु भइसकेको छ । ‘हामीले आगामी दशैंदेखि व्यावसायिक उडान सुरु गर्ने लक्ष्य राखेका छौं, दुई सातापछि डाँफेले भित्र्याउने तयारी गरेको जहाज निरीक्षणका लागि जाँदैछौं,’ उनले भने । थापाका अनुसार आगामी भदौ १५ भित्रै डाँफेले आफ्नै ब्रान्डमा जहाज भित्र्याउने र आवश्यक तयारी पूरा गरी दशैंदेखि उडान सुरु गर्ने योजना छ । दशैं अगाडि नै तीनवटा जहाजमार्फत उडान सुरु गर्ने गरी काम भइरहेको पनि थापाले बताए । डाँफेले ल्याउन लागेका जहाजहरू नेपालमा हाल सञ्चालनमा रहेका अन्य एटीआर जहाजको तुलनामा अत्याधुनिक ग्लास ककपिट प्रविधियुक्त हुनेछन् । यात्रुको सुविधाका लागि ८ देखि १० वटा प्रिमियम सिटसहितका विशेषता डाँफेका जहाजमा हुनेछन् ।

डाँफेले पोखरालाई आधार विमानस्थल बेस बनाएर प्रादेशिक कनेक्टिभिटीमा जोड दिने रणनीति लिएको छ । पोखराबाट महेन्द्रनगर, भद्रपुर, भरतपुर, भैरहवा र सिमरा जस्ता सहरहरूमा सिधा उडान भर्ने डाँफेको योजना छ । यसका साथै काठमाडौंबाट पनि विभिन्न सहरी क्षेत्रका विमानस्थलमा उडान गर्ने तयारी गरिएको छ । कम्पनीले तीन वर्षभित्र ७ वटा एटीआर र ३ वटा जेटस्ट्रिम गरी जम्मा १० वटा जहाज पुर्‍याउने लक्ष्य राखेको छ । जेटस्ट्रिम जहाजहरूलाई विशेष गरी भरतपुर, सिमरा र तुम्लिङटार जस्ता छोटो धावनमार्ग भएका विमानस्थलमा प्रयोग गरिने र एटीआरलाई अन्य सहरी क्षेत्रका विमानस्थलहरुमा प्रयोग गरिने जनाइएको छ । यसले काठमाडौंबाट माउन्टेन, तुम्लिङटार, भद्रपुर, विराटनगर,जनकपुर, सिमरा, पोखरा, भतरपुर, भैरहवा, नेपालगन्ज, सुर्खेत र धनगढीमा उडान गर्ने योजना नेपाल नागरिक उड्डयन प्राधिकरणमा पेश गरेको छ ।

अन्तर्राष्ट्रिय बजारमा बढ्दो इन्धनको मूल्य र सञ्चालन खर्चका कारण बजार प्रतिस्पर्धा चुनौतीपूर्ण देखिए पनि नयाँ प्रविधि र स्तरीय सेवाका माध्यमबाट यात्रुको मन जित्नेमा कम्पनी विश्वस्त छ । क्याप्टेन थापाले नयाँ वायुसेवाको आगमनले नेपाली यात्रुहरूलाई थप विकल्प र गुणस्तरीय सेवा प्राप्त हुने बताए । लामो समयदेखि आन्तरिक उडानमा प्रभुत्व जमाएका बुध्द एयर, यति एयरलाइन्स र प्रतिस्पर्धी क्षमता बढाउँदै लगेको श्री एयरलाइन्ससँग प्रतिस्पर्धा गर्ने गरी डाँफेले आफ्नो बजार रणनीति तयार गरेको छ ।

उड्डयन प्राधिकरणको नियम अनुसार जहाज ल्याउने अनुमति एनओसी पाएपछि सम्बन्धित कम्पनीले एक वर्षभित्र जहाज ल्याइसक्नुपर्छ । प्राधिकरणका अनुसार डाँफे एयरसँगै हेलि नेपाल र सगरमाथा हेलिकप्टरले पनि एनओसी लिएका छन् । हेलिकप्टर कम्पनीमध्ये सगरमाथाले माउन्टेन हेलिकप्टरको एउटा जहाज खरिद गरिसकेको छ भने उक्त हेलिकप्टर सगरमाथाको नाममा नामसारी हुने प्रक्रियामा रहेको छ ।