सामग्री खोज्नुहोस्

दाङ । लुम्बिनी प्रदेशसभाबाट ‘लुम्बिनी अनुसन्धान तथा प्रशिक्षण प्रतिष्ठानको स्थापना, सञ्चालन तथा व्यवस्थापन गर्न बनेको विधेयक’ सर्वसम्मत रूपमा पारित भएको छ।

शुक्रबार बसेको प्रदेशसभाको बैठकमा मुख्यमन्त्री चेतनारायण आचार्य का तर्फबाट भौतिक पूर्वाधार तथा विकासमन्त्री भूमिश्वर ढकाल ले विधेयक पारित गरियोस् भन्ने प्रस्ताव प्रस्तुत गरेका थिए। सभामुख तुलाराम घर्तीमगर ले विधेयकको उद्देश्यबारे जानकारी दिँदै सर्वसम्मत रूपमा पारित भएको घोषणा गरे।

विधेयकले प्रदेश तथा स्थानीय तहका निर्वाचित वा मनोनीत पदाधिकारी, सरकारी निकाय तथा सार्वजनिक संस्थामा कार्यरत कर्मचारीलाई प्रशिक्षण प्रदान गर्ने तथा संघीयता, सुशासन र विकास व्यवस्थापनसँग सम्बन्धित अनुसन्धान प्रवर्द्धन गर्ने लक्ष्य लिएको छ। दिउँसो बसेको ११औं बैठकले ‘जिल्ला सभा तथा जिल्ला समन्वय समिति सञ्चालन सम्बन्धी ऐन, २०७५ लाई संशोधन गर्न बनेको विधेयक’ पुनः छलफलका लागि प्रदेश मामिला तथा कानुन समितिमा पठाउने निर्णय गरेको छ। उक्त प्रस्ताव पनि मन्त्री ढकालले नै प्रस्तुत गरेका थिए।

बैठकमा प्रदेशसभा सदस्यहरू तुलसीप्रसाद चौधरी, खड्ग बस्नेत, इन्द्रजीत थारु, रामजी घिमिरे, माया पुन, जानकी न्यौपाने, चन्द्रकेश गुप्ता, मिना बुढा, सुधाकर पाण्डे, अम्बिका काफ्ले र वसिउद्दिन खाँले समसामयिक विषयमा धारणा राखेका थिए। ऊर्जा, जलस्रोत तथा सिंचाइमन्त्री सिता शर्मा चौधरी र उद्योग, पर्यटन तथा यातायातमन्त्री प्रचण्ड विक्रम न्यौपाने ले उठेका प्रश्नहरूको जवाफ दिएका थिए।

त्यस्तै, ११औं बैठकमा प्रदेशसभा सदस्य निमा गिरी र निलम पास्वानले सम्बोधन गरेका थिए। बैठकले ‘वन ऐन २०७८ लाई संशोधन गर्न बनेको विधेयक’ दफावार छलफलका लागि कृषि, वन तथा वातावरण समितिमा पठाउने निर्णय गरेको छ। उक्त प्रस्ताव वन तथा वातावरणमन्त्री देवकरणप्रसाद कलवार ले प्रस्तुत गरेका थिए। प्रदेशसभाको अर्को बैठक वैशाख ६ गते आइतबार दिउँसो १ बजे बस्ने तय भएको छ।