सामग्री खोज्नुहोस्

बुटवल । नेपाल पत्रकार महासङ्घ रुपन्देहीले ७१औँ स्थापना दिवसका अवसरमा मिडिया कप र कर्पोरेट कप फुटसल प्रतियोगिता आयोजना गर्ने भएको छ ।

महासङ्घ रुपन्देहीले यही चैत १६ र १७ गते दोस्रो मिडिया कप फुटसल प्रतियोगिता र दोस्रो कर्पोरेट कप फुटसल प्रतियोगिताको आयोजना गरेको कार्यक्रम संयोजक सुमन श्रेष्ठले जानकारी दिए ।

उनका अनुसार बुटवल ८ सुख्खानगर नमूनापथ स्थित एडरिक फुटसल कोर्टमा आयोजना हुने फुटसल प्रतियोगिता अन्तर्गत मिडिया कप फुटसल प्रतियोगिताको पुरस्कार राशि प्रथम हुनेलाई रु। २० हजार र दोस्रो हुनेलाई १५ हजार, मेडल, कप र प्रमाणपत्र प्रदान गरिनेछ ।

यस्तै, कर्पोरेट कप फुटसल प्रतियोगिताको विजेताले रु। ३० हजार र दोस्रो हुनेले २० हजार तथा मेडल, कप र प्रमाण पत्र प्राप्त गर्ने उनले बताए ।

विधागत पुरस्कारतर्फ उत्कृष्ट खेलाडी, सर्वाधिक गोलकर्ता, उत्कृष्ट गोलरक्षक र कर्पोरेट कपमा अनुशासित टिमलाई समेत पुरस्कारको व्यवस्था गरिएको छ ।

फुटसल प्रतियोगिता आयोजना गर्नका लागि महासङ्घले सहसचिव सुमनरश्मि श्रेष्ठको संयोजकत्वमा सदस्य दिनेश श्रेष्ठ र सदस्य अनिता चौधरी सदस्य रहेको समिति बनाएको छ ।

यस्तै, खेलमा निर्णायक तथा सहजीकरणको लागि खेलकुद पत्रकार मञ्चका अध्यक्ष सुमन अधिकारी, यमलाल भुसाल र स्वस्तिक श्रेष्ठ रहेको कार्यदल निर्माण गरिएको सचिव सीपी खनालले जानकारी दिए ।

गत वर्ष आयोजना गरिएको फुटसल प्रतियोगिताबाट बचत भएको रकमबाट उत्कृष्ट खेलकुद पत्रकारिता पुरस्कार स्थापना गरिएको र पहिलो पुरस्कार फुटसल प्रतियोगिताको समापनको अवसरमा प्रदान गरिने सचिव खनालले बताए ।

यस्तै, सुत्केरी पोषण तथा बाल बचत खाताका लागि कोष स्थापना गरी हालसम्म ५ जनालाई सुत्केरी भत्ताबापत जनही रु. ५ हजार तथा बालबचतवापत् जनही रु. ५ हजार प्रदान गरिसकिएको महासङ्घ रुपन्देहीका अध्यक्ष दिनेश पाण्डेले बताए । उनले यस पटक पनि फुटसल आयोजनाबाट बचत भएको रकम खेलकुद पत्रकारिता पुरस्कार कोष र सुत्केरी कोषमा जम्मा गरिने बताए ।

यसअघि गत वर्ष भएको पहिलो संस्करणमा कर्पोरेट कपको उपाधि इन्जिनियर्स एसोसिएसन लुम्बिनीले जितेको थियो भने मिडिया कपको उपाधि ग्लोबल आवाजले जितेको थियो ।