सामग्री खोज्नुहोस्

काठमाडौँ: नेपाल कम्युनिष्ट पार्टी (एमाले) ले आसन्न प्रतिनिधिसभा सदस्य निर्वाचनका लागि आफ्नो घोषणापत्र सार्वजनिक गरेको छ । एमालेको केन्द्रीय निर्वाचन परिचालन कमिटीले आयोजना गरेको चुनावी घोषणापत्रमा आधारित बहस ‘देश पहिला’ कार्यक्रममा अध्यक्ष केपी शर्मा ओलीले सम्बोधन गर्दै लक्ष्य निर्धारणहित प्रतिबद्धता सार्वजनिक गरे ।

एमालेले ‘समृद्ध नेपाल, सुखी नेपालीः राष्ट्रिय आकाङ्क्षा हाम्रो गन्तव्य’ को नारासहित त्यसलाई पूरा गर्न आफ्नो पार्टीलाई विजयी गराउनुपर्नेमा जोड दिएको छ । विगतमा आफ्नो पार्टी सरकारमा हुँदा थालिएका र पूरा गर्न नपाएका सुशासन, विकास, रोजगारी र सामाजिक न्यायका क्षेत्रलाई एमालेले मुख्य प्राथमिकता दिएको छ ।

घोषणापत्रमा तत्काल गर्ने ११ काम, पाँच आधारभूत काम र २५ सङ्कल्प सार्वजनिक गरिएको छ । अध्यक्ष ओलीले भत्काउने र जलाउने नभई बनाउने सङ्कल्पका साथ एमालेले विगतका अनुभव र अभ्यासका कारण मुलुकको मुहार फेर्ने कामको अगुवाइ गर्ने दाबी गरे । उनले स्वाधीनता र राष्ट्रियताको पक्षमा एमाले सधैँ दृढ रहेको स्पष्ट गर्दै आफूहरु कुनै लोकप्रितावाद वा स्टन्टमा केन्द्रित नहुने बताए ।

‘एमालेले बनाउँछ’ भन्ने मूल नाराका साथ सार्वजनिक गरिएको घोषणापत्रको खण्ड ‘ङ’ र ‘च’ मा पार्टीले आफ्नो नेतृतवमा सरकार गठन भएमा गर्ने तत्कालका कामहरू र दीर्घकालीन विकासका २५ वटा आधारस्तम्भहरूलाई मुख्य बाचाका रूपमा अघि सारेको छ।

एमालेले विशेषगरी महिला, युवा, विद्यार्थी, श्रमिक र विपन्न वर्गलाई लक्षित गरी लोकप्रिय कार्यक्रमहरू घोषणा गरेको छ।

घोषणापत्रमा एमालेले महिला तथा सामाजिक सुरक्षालाई उच्च प्राथमिकतामा राखेको छ। जसअनुसार घट्दो जनसंख्या वृद्धिदरलाई सन्तुलनमा ल्याउन र मातृशिशु स्वास्थ्य सुधार गर्न सुत्केरी हुने महिलालाई प्रतिजन्म २० हजार रुपैयाँ पोषण भत्ता दिने घोषणा गरिएको छ।

साथै, गर्भवती महिलाको ५ लाखसम्मको जीवन बीमा निःशुल्क गर्ने र उनीहरूको स्वास्थ्य परीक्षण तथा यातायात खर्च दोब्बर गर्ने प्रतिबद्धता एमालेले जनाएको छ। महिला उद्यमशीलता विकासका लागि २० लाख रुपैयाँसम्मको निर्व्याजी ऋण र विद्यालयका छात्राहरूलाई निःशुल्क स्यानिटरी प्याड उपलब्ध गराउने एमालेको योजना छ।

युवा तथा विद्यार्थीहरूका लागि एमालेले विशेष प्याकेज ल्याएको छ। प्राविधिक धारमा उच्च शिक्षा अध्ययन गर्न चाहने विद्यार्थीलाई २० लाख रुपैयाँसम्मको निर्व्याजी ऋण उपलब्ध गराउने र उनीहरूलाई पढ्दै कमाउँदै गर्ने वातावरण निर्माण गर्न ‘इन्टर्नसिप’ को व्यवस्था गरिनेछ।

सूचना प्रविधि र स्टार्टअपमा लाग्ने युवाहरूलाई अन्तर्राष्ट्रिय कारोबार गर्न सहज होस् भन्ने उद्देश्यले १० हजार डलर बराबरको ‘डलर कार्ड’ उपलब्ध गराउने तथा १८ देखि २८ वर्ष उमेर समूहका युवालाई वार्षिक रूपमा मासिक १० जीबी डाटा निःशुल्क दिने बाचा पनि घोषणापत्रमा समेटिएको छ।

श्रमिक र विपन्न वर्गको उत्थानका लागि एमालेले न्यूनतम पारिश्रमिक मासिक २५ हजार रुपैयाँ पुर्‍याउने महत्त्वाकाङ्क्षी योजना अघि सारेको छ। वैदेशिक रोजगारीमा रहेका श्रमिकहरूले वैधानिक बाटोबाट विप्रेषण (रेमिट्यान्स) पठाएमा उनीहरूको बैंक खातामा वार्षिक ५ हजार रुपैयाँ थप बोनस सरकारले जम्मा गरिदिनेछ।

यसैगरी, गरिब तथा विपन्न परिवारले सहकारी तथा वित्तीय संस्थाहरूबाट लिएको २५ हजार रुपैयाँसम्मको ऋण मिनाहा गर्ने र उनीहरूलाई योगदानमा आधारित सामाजिक सुरक्षाको दायरामा ल्याउने एमालेको प्रतिबद्धता छ।

शिक्षा र स्वास्थ्य क्षेत्रमा सुधार गर्न एमालेले शिक्षकहरूको मर्यादाक्रम तोक्ने, कक्षा १० सम्मका विद्यार्थीलाई दिवा खाजाको व्यवस्था गर्ने र स्वास्थ्य स्वयंसेविकाको भत्ता बढाएर २० हजार पुर्‍याउने घोषणा गरेको छ।

सुरक्षाकर्मीहरूको मनोबल उच्च राख्न उनीहरूको सम्मान र कल्याणका विशेष कार्यक्रमहरू सञ्चालन गरिने घोषणापत्रमा उल्लेख छ। यसका साथै, एमालेले समृद्धिका २५ स्तम्भहरू अन्तर्गत अर्थतन्त्रको आकार १० वर्षमा २०० खर्ब पुर्‍याउने, स्वदेशमै रोजगारी सिर्जना गर्ने, सुरक्षित आवास र आधुनिक सहर निर्माण गर्ने र पूर्व–पश्चिम रेलमार्ग तथा मेट्रो रेल जस्ता ठूला पूर्वाधारहरू निर्माण गरी मुलुकको मुहार फेर्ने संकल्प गरेको छ।

डिजिटल नेपाल, सुशासन, कृषिमा आधुनिकीकरण र भ्रष्टाचार नियन्त्रणलाई पनि एमालेले प्रमुखताका साथ समावेश गरेको छ।

 

यस्ता छन् २५ बाचा (प्रतिबद्धता)

–सहरको स्वच्छता, पूर्वाधारको पूर्णताः समुन्नत सहर हाम्रो प्रतिबद्धता

–स्वच्छ पानी, सफा आँगनः स्वस्थ नेपाली, हाम्रो अभियान

–उद्योग क्षेत्रको विस्तार, उत्पादनमा बृद्धिः २० प्रतिशत योगदान, राष्ट्रको समृद्धि

–आयात घटाउने, निर्यात बढाउनेः भुक्तानी सन्तुलन राष्ट्रिय पक्षमा ल्याउने

–आधुनिक खेती, उन्नत व्यवसायः कृषिमै रोजगारी, पर्याप्त आय

–हरियो वन, समुदायको धनः संरक्षण, उपयोग, दिगो व्यवस्थापन

–सहकारीमा सुशासन र पारदर्शिताः बचतकर्ताको हित, हाम्रो प्रतिबद्धता

–पर्यटकको वृद्धि, लामो बसाइः गाउँ, सहरमा काम र कमाइ

–खेतीयोग्य जमिनमा कुलो र नहरः बाह्रै महिना सिँचाइ, खाद्यमा आत्मनिर्भर

–गुणस्तरीय शिक्षा, उन्नत प्रविधिः ज्ञानयुक्त नागरिक, देशका निधि

–स्वस्थ खाना, योग/व्यायामः निरोगी नेपालको महाअभियान

–डिजिटल पूर्वाधारः विकास र सुशासनको आधार

–सुरक्षित यातायात, आधुनिक पूर्वाधारः दिगो विकास, समृद्धिको आधार

–स्वच्छ ऊर्जा, स्वदेशमा खपतः हरित विकास, विदेशमा निर्यात

–पुनर्निर्माण र नयाँ निर्माण

–सुदृढ वित्तीय प्रणालीः उत्पादनशील लगानी

–सिर्जनशीलता युवा, नवीन विचारः समाज रूपान्तरणको सुदृढ आधार

–ऊर्जावान् खेलाडी, देशको शानः खेलकुदको विकास, राष्ट्रको मान

–सफा हात, स्वच्छ प्रशासनः गुणस्तरीय सेवा, जनप्रिय शासन

–सबैसँग मित्रता, छैन कसैसँग शत्रुता

–नेपालका सद्भाव दूत, एनआरएनको सम्मानः मातृभूमिको विकासमा सार्थक योगदान