सामग्री खोज्नुहोस्

काठमाडौँ ।

दक्षिण कोरियाली अदालतले पूर्वराष्ट्रपति युन सुक योललाई ‘मार्शल ल’ लागू गर्ने निर्णयसँग सम्बन्धित केही अभियोगमा दोषी ठहर गर्दै पाँच वर्षको जेल सजाय सुनाएको छ ।

सन् २०२४ को अन्त्यतिर पूर्वराष्ट्रपति युनले जारी गरेको आदेश तथा त्यससँग जोडिएका अन्य आरोपहरूमा दायर आठ वटा आपराधिक मुद्दामध्ये यो उहाँविरुद्धको पहिलो अदालत फैसला हो, समाचार संस्था एपीले जनाएको छ ।

ती मुद्दाहरूमा अभियोजन पक्षले उहाँको कदमले देशको संवैधानिक व्यवस्था र लोकतान्त्रिक प्रक्रियामा गम्भीर असर पारेको दाबी गरेको छ ।

पूर्वराष्ट्रपति युनमाथि लागेको सबैभन्दा गम्भीर अभियोगमा उहाँले मार्शल ल कार्यान्वयनका सन्दर्भमा विद्रोहको नेतृत्व गरेको आरोप समावेश छ । यसमा कानूनअनुसार मृत्युदण्डसम्मको सजाय हुनसक्ने प्रावधान छ, तर यो गम्भीर अभियोगमा अन्तिम फैसला अझ बाँकी नै छ ।

सियोल केन्द्रीय जिल्ला अदालतले सम्बन्धित मुद्दामा उहाँलाई हिरासतमा राख्ने अधिकारीहरूको आदेश अवहेलना गरेको लगायतका अन्य अभियोगमा दोषी ठहर गर्दै सजाय सुनाएको हो ।
अदालतले यी कार्यहरूलाई कानूनी शासनविरुद्धको गम्भीर चुनौतीको रूपमा व्याख्या गरेको छ ।

सन् २०२४ को डिसेम्बरमा युनले अल्पकालीन रूपमा मार्शल ल लागू गरेपछि उहाँको कदमविरुद्ध देशभर आन्दोलन सुरु भएको थियो । ती प्रदर्शनहरूमा उहाँको निष्कासनको माग बढ्दै गएपछि अन्ततः महाभियोग लाग्यो, उहाँ पक्राउ परे र राष्ट्रपतिको पदबाट बर्खास्त गरिए ।