खोज

काठमाडौं । निर्वाचन प्रहरीका लागि १ लाख ७२ हजार ८७७ जनाले आवेदन दिएका छन् । प्रहरी प्रधान कार्यालयले पुस २४ गते एक सूचना जारी गर्दै निर्वाचन प्रहरी हुन इच्छुकका लागि माघ १ गतेसम्म आवदेन खुलाएको थियो ।

जसमा बिहीबारसम्म १ लाख ७२ हजार ८७७ को आवेदन केन्द्रीय प्रहरी प्रवक्ता डीआईजी अविनारायण काफ्ले जानकारी दिए ।

फागुन २१ का लागि तय गरिएको प्रतिनिधिसभा सदस्यका चुनावका लागि सरकारले १ लाख ४९ हजार ९० जना निर्वाचन प्रहरी भर्ना गर्ने निर्णय गरेको थियो । जसमा २३ हजार ७८७ जना बढीले आवेदन दिएका छन् ।

तर, केही जिल्लाहरूमा भने माग भएको निर्वाचन प्रहरीभन्दा कमको आवेदन परेको छ । जसमा कास्कीसमेत छ । प्रहरी प्रधान कार्यालयका अनुसार आवेदन कम परेका कास्कीसहितका ३६ जिल्ला पुनः २ दिन म्याद थप गरेर आवेदन माग गरिएको छ ।

नेपाल प्रहरीमार्फत १ लाख ३३ हजार ९ सय ८० जना र सशस्त्र प्रहरीमार्फत १५ हजार १ सय १० जना निर्वाचन प्रहरी भर्ना गर्ने तयारी छ ।

निर्वाचन प्रहरीमा आवेदन दिनका लागि १८ वर्ष पूरा भई ५४ वर्ष ननाघेको, साधारण लेखपढ गर्न जान्ने, नैतिक पतन देखिने फौजदारी अभियोगमा अदालतबाट सजाय नपाएको, भर्ना हुने समयमा कुनै दलको सदस्य नभएको, शारीरिक तथा मानसिक रूपमा स्वस्थ, आतंककारी वा विध्वंसात्मक संगठनको सदस्य नभएको र नेपाली नागरिक हुनुपर्ने योग्यता तोकिएको छ ।

पुरुषको हकमा कम्तीमा ५ फिट उचाइ, छातीको चौडाइ ३१ देखि ३३ इन्च, कम्तीमा ५० किलो तौल हुनुपर्ने छ । महिलाको हकमा कम्तीमा ४ फिट १० इन्च उचाइ, ४२ किलो तौल र गर्भवती नभएको हुनुपर्ने मापदण्ड तोकिएको छ ।

छनोट भएका निर्वाचन प्रहरीलाई १० दिनको तालिम दिई ३० दिन काममा खटाइनेछ । निर्वाचन प्रहरीमा भर्ना हुनेले नेपाल प्रहरी र सशस्त्र प्रहरीका जवानले पाउने आधारभूत तलबमान, लत्ताकपडा तथा जवानसरहको रासन भत्ता पाउनेछन् । यसअनुसार निर्वाचन प्रहरीले ४० दिनको ३४ हजार रुपैयाँ तलब तथा सुरक्षाकर्मीले पाएसरह ४० दिनको रासन भत्ता पाउने व्यवस्था गरिएको छ ।