सामग्री खोज्नुहोस्

नयाँ दिल्ली ।

अमेरिकाका राष्ट्रपति डोनाल्ड ट्रम्पले भारतले रुसबाट तेल खरिद कम गर्ने आफ्नो माग पूरा नगरेको खण्डमा भन्सार शुल्क (ट्यारिफ) बढाउने चेतावनी दिएका छन् । उनले भने कि मोदी राम्रो मान्छे भए पनि आफूलाई खुसी नबनाएकोमा असन्तुष्टि व्यक्त गरेका हुन् ।

‘मोदी राम्रो मान्छे हुन् । म खुसी थिएनँ भन्ने उनलाई थाहा थियो र मलाई खुसी पार्नु महत्वपूर्ण थियो,’ ट्रम्पले आइतबार पत्रकारहरूसँग भने । ‘उनीहरू तेलको व्यापार गर्छन्, हामी छिट्टै ट्यारिफ बढाउन सक्छौँ ।’

अन्तर्राष्ट्रिय समाचार संस्था रोयटर्सका अनुसार भारतको वाणिज्य मन्त्रालयले अहिलेसम्म यस विषयमा कुनै प्रतिक्रिया दिएको छैन ।

व्यापारिक विषयमा यसअघि पनि अमेरिकाले भारतमाथि ५० प्रतिशतसम्म कर बढाएको थियो । तर, भारतीय प्रधानमन्त्री नरेन्द्र मोदी र ट्रम्पबीचको वार्तापछि अमेरिका पछि हटेको थियो । ट्रम्पले अक्टोबरमा भएको भेटमा मोदीले रुसबाट तेल किन्न बन्द गर्ने आश्वासन दिएको तर अहिलेसम्म कार्यान्वयन नगरेको गुनासो पनि गरेका छन् । रोयटर्सले ट्रम्प-मोदी भेटमा यसबारे कुरै नभएको स्पष्ट पारेको छ ।

ट्रम्पका नयाँ टिप्पणीले भारत र अमेरिकाबीच कूटनीतिक सम्बन्धमा नयाँ तनाव सुरु भएको आकलन गरिएको छ । रुस भारतको सबैभन्दा ठूलो तेल आपूर्तिकर्ता हो ।

यसअघि ट्रम्प प्रशासनका धेरै अधिकारीहरूले रुसले तेल व्यापारबाट प्राप्त आय युक्रेनमा युद्धका लागि प्रयोग गर्ने गरेको आरोप लगाएका थिए । साथै भारतले पनि रुसी तेल फेरि बेचेर अर्बौं डलर कमाइ गरिरहेको आरोप लागेको छ । ट्रम्पद्वारा भारतमाथि भारी ट्यारिफ लगाउने कदमलाई मुख्य रूपमा पुटिनमाथि युक्रेन आक्रमण रोक्न दबाब दिने रणनीतिका रूपमा हेरिएको छ ।

अगस्ट २०८५ मा अमेरिकाबाट भारतीय वस्तुहरूमा ५० प्रतिशत ट्यारिफ लागेपछि निर्यात क्षेत्रमा ठूलो झटका परेको बताइएको छ । अमेरिकातर्फ हुने करिब ४८–५० अर्ब डलरको निर्यात प्रभावित भयो, जुन कुल निर्यातको १८–२० प्रतिशत हो । सबैभन्दा बढी असर कपडा, छाला, आभूषण, सी-फुड र अटो क्षेत्रमा परेको छ ।