खोज

कपिलवस्तु-कपिलवस्तुको यशोधरा गाउँपालिका वडा नम्बर ७ मर्यादपुरमा स्थानीयवासी नागरिकहरूको गुनासो, पिरमर्का, राय तथा सुझाव प्रत्यक्ष रूपमा ग्रहण गर्ने उद्देश्यले नागरिक सुनुवाइ तथा अन्तरक्रिया कार्यक्रम सम्पन्न भएको छ ।

सोमबार सम्पन्न उक्त कार्यक्रम जिल्ला प्रशासन कार्यालय कपिलवस्तु र जिल्ला प्रहरी कार्यालय कपिलवस्तुको संयुक्त आयोजनामा सञ्चालन गरिएको हो ।

कार्यक्रम स्थानीय तहमा शान्ति सुरक्षा, अपराध नियन्त्रण तथा सेवा प्रवाहसम्बन्धी सचेतना अभिवृद्धि गर्ने उद्देश्यले आयोजना गरिएको जनाइएको छ।

प्रमुख जिल्ला अधिकारी जनार्दन गौतमनागरिकका गुनासोलाई गम्भीरतापूर्वक लिइने र कानूनको दायराभित्र रहेर समाधानका लागि प्रशासन प्रतिबद्ध रहेको बताए। उनले नागरिक र प्रशासनबीचको समन्वयले मात्र शान्ति सुरक्षालाई प्रभावकारी बनाउन सकिने उल्लेख गरे।

प्रहरी उपरीक्षक सन्तोष आचार्य समुदाय–प्रहरी साझेदारीको अवधारणालाई बलियो बनाउँदै अपराध नियन्त्रण र सेवा प्रवाहलाई अझ प्रभावकारी बनाइने प्रतिवद्धता व्यक्त गरे।

कार्यक्रम यशोधरा गाउँपालिका वडा नम्बर ७ मर्यादपुरका वडा अध्यक्ष चन्द्रप्रकाश दुबेको अध्यक्षता र मर्यादपुर प्रहरी चौकीका इन्चार्ज जीवनदीप शर्माको सञ्चालनमा भएको कार्यक्रममा स्थानीयवासीहरूले शान्ति सुरक्षा, चोरी, लागूऔषध, घरेलु हिंसा, सार्वजनिक सेवा प्रवाह, प्रहरी प्रशासनसँग सम्बन्धित व्यवहारिक समस्या लगायतका विषयमा आफ्ना गुनासो तथा सुझावहरू प्रस्तुत गरेका थिए ।