खोज

बुटवल । यात्रुवाहक बस, चालक, मजदुर र यात्रुका लागि सवारी दुर्घटना न्यूनीकरण, व्यवस्थापन र ट्राफिक शिक्षा प्रदान गर्ने उद्देश्यका साथ ट्राफिक प्रहरी सहित सवारी धनी, मजदुर र अभियन्ताहरु सडकमै उत्रेका छन्।

पश्चिम नेपाल बस व्यवसायी प्रा.लि.को संयोजनमा ट्राफिक प्रहरी र विभिन्न संघसंगठनको सहभागितामा दुर्घटना न्यूनिकरणका लागि सडकमै पुगेर सवारी साधनको चेकजाँचसँगै अनुगमन र ट्राफिक जनचेतना कार्यक्रम सञ्चालन गरिएको हो।

सवारी साधनहरुको कागजपत्र चेकजाँच गर्ने, साधनको यान्त्रिक अवस्थाका बारेमा जानकारी लिने तथा चालक, सहचालक र यात्रुहरुलाई ट्राफिक शिक्षा प्रदान गर्ने उद्देश्यले कार्यक्रम गरिएको पश्चिम नेपाल बस ब्यबसायी प्रा.लि.का सञ्चालक तथा दुर्घटना न्यूनिकरण अभियानका संयोजक नारायण घिमिरेले बताए।

सवारी साधनको कन्डिसन, सार्वजनिक यातायात क्षेत्रका चालक र सहचालकले गर्नुपर्ने व्यवहार तथा यात्राका क्रममा यात्रुहरुले ध्यान दिनुपर्ने कुराहरुका बारेमा जनचेतनामूलक कार्यक्रम संचालन गरिएको संयोजक घिमिरेको भनाई थियो।

दुर्घटना न्यूनिकरणका लागि सवारी चालक, सहचालक, बसका यात्रुहरु र पैदल यात्रुहरुले समेत ध्यान दिनुपर्ने कुराहरुका बारेमा जानकारी प्रदान गर्ने उद्देश्यले नेपाल प्रहरी, राजमार्ग सुरक्षा तथा ट्राफिक ब्यबस्थापन कार्यालय बुटवलका प्रहरी निरिक्षक रुद्रनाथ गिरीले बताए।

यसप्रकारको कार्यक्रमले जनचेतना अभिवृद्धि भै चिसो मौसम, शितलहर, बाक्लो हुस्सुका कारण हुनसक्ने दुर्घटना न्यूनिकरणमा सघाउ पुग्ने विश्वास ब्यक्त गर्दै निरिक्षक गिरीले सवारी साधनको यान्त्रिक अवस्था र पैदन यात्रुहरुको कारण दुर्घटना हुने जोखिम बारेमा जानकारी गराइएको बताए।

चिसो, हुस्सु र कहिरो बढेसँगै पछिल्लो समय पश्चिम नेपाल बस प्रा.लि.ले सम्भावित दुर्घटना हुने क्षेत्रमा सवारी व्यवस्थापन, तथा दुर्घटना न्यूनिकरणका लागि स्थलगत अनुगमनलाई तिब्रता दिएको छ।

बुटवलदेखि बर्दघाट, त्रिबेणी, परासी, महेशपुर, भैरहवा, सुनौली, लुम्बिनी, चन्द्रौटा, कृष्णनगर रुटमा सडकमै पुगेर सवारी साधनको चेकजाँचसँगै अनुगमन र ट्राफिक जनचेतना प्रदान गरिएको प्रा.लि.ले जनाएको छ।