दाङ। लुम्बिनी प्रदेशका मुख्यमन्त्री चेतनारायण आचार्यले थारु समुदायको परम्परागत कला र संस्कृतिको संरक्षण तथा सम्बर्द्धन गर्दै त्यसलाई व्यवसायिक रूपमा अघि बढाउन जरुरी रहेको बताएका छन् ।
थारु कल्याणकारिणी सभा दाङले शनिबार घोराहीमा आयोजना गरेको माघ सांस्कृतिक महोत्सवको उद्घाटन गर्दै मुख्यमन्त्री आचार्यले कला संस्कृतिलाई पर्यटनसँग जोडेर आम्दानीको माध्यम बनाउन सकिने बताएका हुन ।
उनले थारु समुदायका संस्कृतिहरू वर्षैभरि प्रस्तुत गर्ने र व्यवस्थित ढंगले विकास गर्नुपर्ने आवश्यकता औंल्याए । आन्तरिक तथा बाह्य पर्यटकलाई आकर्षित गर्न सक्ने गरी कार्यक्रमहरू अगाडि बढाउनुपर्ने उनको भनाइ थियो । थारु संस्कृति जोगाएर राख्ने समुदायप्रति उनले आभार समेत व्यक्त गरे ।
मुख्यमन्त्री आचार्यले थारु समुदायलाई राज्यको मूलधारमा ल्याउने उद्देश्यसहित प्रदेश सरकारले प्राथमिकतामा राखेर काम गरिरहेको स्पष्ट पारे ।
थारु समुदायको कला, संस्कृति, सभ्यता र परम्परालाई सिकाइका लागि थारु संग्रहालयलाई उपयोग गरिएको बताए । प्रदेश सरकारको बजेटबाट थारु संग्रहालय निर्माण गरिएको जानकारी दिँदै उनले देशभरका थारु समुदायको भेषभूषा, संस्कृति र परम्पराबारे सिक्न सक्ने साझा केन्द्रका रूपमा संग्रहालय स्थापना गरिएको बताए ।
उनले यसको संरक्षणका लागि प्रदेश सरकारले विभिन्न कार्यक्रमहरू सञ्चालन गरिरहेको जानकारी दिए । भौगोलिक विविधताजस्तै समुदाय अनुसार कला र संस्कृतिमा रहेको विविधता नै लुम्बिनी प्रदेशको वैभव भएको उनको भनाइ थियो ।
महोत्सवमा पूर्व सांसद शान्ता चौधरी, घोराही उपमहानगरपालिकाका नगरप्रमुख नरुलाल चौधरी, थारु अगुवा चन्द्रबहादुर चौधरी लगायतले शुभकामना दिएका थिए ।
महोत्सवमा सात दर्जनभन्दा बढी मघौटा नाच, छोक्रा, हुर्डुङया नाच, ढुम्री गतिको प्रस्तुति राखिएको थियो। “आर्थिक जागरण र सांस्कृतिक रुपान्तरण हमार अभियान, समाजिक न्याय सहितके समृद्धिम हमार योगदान” भन्ने मुल नारा सहित आयोजना गरिएको महोत्सव उद्घाटनअघि घोराहीका मुख्य बजार क्षेत्रमा थारु मौलिक भेषभूषासहित थारु संस्कृतिको झाँकीसहित बजार परिक्रमा गरिएको थारु कल्याणकारिणी सभा दाङका अध्यक्ष अशोक चौधरीले जानकारी दिए।
६ माघ २०८२, मंगलवार
