खोज

बुटवल-रूपन्देहीको कञ्चन गाउँपालिका रुद्रपुरका १७ वर्षीय इशान शर्मा पौडेलको मृत्यु शंकास्पद भन्दै परिवारले सत्यतथ्य घटना बाहिर ल्याउन माग गरेका छन्। इशानको मृत्यु नभइ हत्या भएको परिवारको दाबी छ।

इशानकी आमा रमा शर्माले आफ्नो बुढेशकालको सहाराको लठ्ठी भाचिएको भन्दै न्याय दिन माग गरिन्। ‘न्याय नपाएकी आमा हुँ म । मेरो कोख रित्तियो । मेरो बुढेसकालको सहारा मेरो लठ्ठी भाँचियो । यहाँ भएका लाखौ इशान मर्न भएन’-उनले भनिन् ।  उनले सत्यतथ्य सार्वजनिक गर्न माग गरिन्।

कञ्चन गाउँपालिका-३ धौलागिरीका इशानको दुर्घटनाबाट मृत्यु नभई हत्या भएको इशानका ठुलो बुवा पुष्पराज शर्माले दाबी गरे।

‘घटनाको वस्तुगत अवस्था, शवको प्रकृति, घटना स्थलमा भएको अवस्थाले इशानको मृत्यु गाडी दुर्घटनामा भएको होईन, त्यो हत्या नै हो । यसको छानविन चुस्त होस’- उनले भने ।

पुस २ गते विद्यालयमा तेकान्दो सिकाएर घर आएका उनी साँझ साढे ५ बजे साथीसँग जिम जाने भन्दै घरबाट थकालीचोकतिर गएका थिए । त्यसपछि साँझ करिव साढे ७ बजे इशान रुद्रपुरकै सुनगाभा चोकबाट साथीसँग बिदा भएर हातमा जुत्ता लिएर घरतर्फ हिँडेको सिसिटीभिमा देखिएको छ।

सोही दिन घर नआएका इसानका परिवारले साथीकोमा बसेको अनुमानमा खोजविन गरेनन्। अर्को दिन भने विद्यालयमा इशान नगएपछि परिवारले ईशानको खोजी सुरु गरेको थियो। इशानको शव पुस ३ गते बिहीबार घर नजिकैको नालीमा चोटपटक लागेको अवस्थामा भेटिएको थियो।

इशानका ठुलो बुवा पुष्पराज शर्माले पनि अर्को दिन मात्र ईलाका प्रहरी कार्यालय रुद्रपुरमा ‘बालक हराएको’ सूचना दिन पुगेको बेला मात्र इशानको शव भेटिएको खवर पाएको बताए।

‘देव्रे खुट्टा भाचिएको छ । बाहिर रगतका थोपा केही छैन, दुर्घटनास्थलमा ब्रेक लागेको संकेत छैन । धुलो माडिएको छैन । हिलो घसारिएको छैन । एक्कासी टिपेर लगेर राखिएको जस्तो छ । टाउकोमा गम्भिर चोट र आँखामा चोट छ । दुर्घटनामा यस्तो हुँदैन । आँखाको नानीमा लक्षित गरेर प्रहार गरिएको छ’ उनले भने।

प्रहरीका अनुसार ईशान बुधबार साँझ ८ बजेदेखि सम्पर्कविहीन थिए। उनको शव घरभन्दा डेढ सय मिटर टाढा नालीमा भेटिएको थियो । उनको टाउकोको पछाडि भागमा चोट थियो।

जिल्ला प्रहरी कार्यालय रुपन्देहीका सूचना अधिकारी प्रहरी नायव उपरिक्षक सुरज कार्कीले ईशानको दुर्घटनामा मृत्यु भएको प्रारम्भिक रिपोर्ट आएको भन्दै आफुहरु अझै अनुसन्धानमै रहेको बताए। ईशानको कुनै व्यक्तिबाट हत्या भएको नभई लु २ ख ४९४८ नम्बरको फोर्स गाडीले ठक्कर दिई मृत्यु भएको प्रारम्भिक प्रतिवेदन प्रहरीले सार्वजनिक गरेको थियो।

फोर्स चालकलाई प्रहरीले पक्राउ गरी थप अनुसन्धान गरिरहेको जनाएको छ।