खोज

बुटवल-नेकपा एमालेका नेता तथा पूर्व प्रतिनिधि सभा सदस्य वासुदेव घिमिरे राष्ट्रिय स्वतन्त्र पार्टी प्रवेश गर्ने भएका छन्।

रुपन्देही २ बाट प्रतिनिधि सभा सदस्यमा उम्मेदवारी दिने गरी प्रस्ताव आएको र त्यसमा सकारात्मक रहेको घिमिरेले बुटवल टुडेलाई बताए।

‘राष्ट्रका लागि तपाइँको आवश्यकता छ तपाइँ हाम्रो टीममा आउनुस् र सँगै अघि बढौं भन्ने कुरा भएको छ-उनले बुटवल टुडेसँग भने-म अहिलेसम्म एमालेकै संगठित सदस्य छु, टुंगो लाग्न बाँकी छ, तैपनि म प्रस्तावप्रति सकारात्मक छु।’

उनले मुलुकले परिवर्तन खोजिरहेकाले प्रस्तावप्रति सकारात्मक रहेको र केही विषयमा कुरा टुंगिन बाँकी रहेकाले रास्वपा जाने टुंगो लागिनसकेको बताए।

रुपन्देही २ बाट निर्वाचन लड्ने गरी रास्वपा प्रवेश गर्न लागेको भन्ने चर्चा छ नि भन्ने प्रश्नमा उनले भने-‘यही क्षेत्रबाट निर्वाचन लड्ने भन्ने टुंगो लागेको छैन, सबैकुरा टुंगिएपछि मुलुकको आवश्यकताअनुसार अघि बढ्न सकिन्छ।’ घिमिरे बालेनको टीमबाट रास्वपा प्रवेश गर्न लागेका हुन्। बालेनले घिमिरेलाई उदाहरणीय कार्य गर्दै आएको भन्दै पटक पटक प्रशंसा गर्दै आएका थिए।

तिलोत्तमा नगरपालिकाका पूर्व नगर प्रमुख उनी २०७९ मा रुपन्देही ५ बाट प्रतिनिधि सभा सदस्य निर्वाचित भएका थिए।