खोज

काठमाडौँ ।

त्रिभुवन विश्वविद्यालयका १६ हजार विद्यार्थी दीक्षित भएका छन् । दशरथ रंगशालामा आज (बिहीबार) भएको ५१औँ दीक्षान्त समारोहमा १६ हजार ३८० विद्यार्थी दीक्षित भएका हुन् ।

त्रिविबाट यसै सत्रमा स्नातक, स्नातकोत्तर, दर्शनाचार्य र विद्यावारिधि तहसमेत गरी ८९ हजार १९१ विद्यार्थी उत्तीर्ण भएका छन् । यसमध्ये १६ हजार ३८० जना विद्यार्थीले दीक्षान्त समारोहमा सहभागिता जनाउन निवेदन दिएका थिए ।

त्रिविबाट यसपटक मानविकीका १४ हजार ८५१, व्यवस्थापनबाट ४३ हजार ६१०, कानुनका २ हजार ३३५ र शिक्षातर्फ १६ हजार ४६७ जना विद्यार्थी उत्तीर्ण भएका छन् ।

भौतिकशास्त्रतर्फ नोबेल पुरस्कार विजेता जापानका आकाताकी काजिताको प्रमुख आतिथ्यतामा भएको समारोहमा विभिन्न सङ्काय तथा तहका परीक्षामा उत्कृष्ट नतिजा हासिल गर्ने ११ जना छात्रा र १४ जना छात्रले पदक प्राप्त गरेका छन् ।

दीक्षान्त समारोहमा त्रिवि कुलपति एवम् प्रधानमन्त्री सुशीला कार्कीले शैक्षिक प्रशासनमा अनावश्यक दलीय हस्तक्षेपले नेपालको उच्च शिक्षा क्षेत्रलाई निरन्तर असर गरेको बताएकी छन् ।

प्रधानमन्त्री कार्कीले भनिन्, “शैक्षिक प्रशासनमा दलीय हस्तक्षेपले असर पारेको बुझेर नै केही ठोस पहल थालेको छौँ । प्रधानमन्त्री नै विश्वविद्यालयको कुलपति हुने व्यवस्थालाई परिमार्जन गर्नुपर्ने आवश्यकता बोध भएको छ । यस विषयमा गम्भीर परामर्श र गृहकार्य भईरहेको छ ।”

प्रधानमन्त्री कार्कीले विश्वविद्यालयले शैक्षिक क्रियाकलापमा प्रविधिको प्रयोग, अनुसन्धान गुणस्तर र वैश्विक पहुँच वृद्धि गर्दै अन्तर्राष्ट्रिय प्रतिस्पर्धामा अझै अब्बल साबित गर्न आवश्यक भएको पनि बताइन् ।

उनले थपिन्, “धेरै विद्यार्थी अध्ययन गर्ने विश्वविद्यालयको ठूलो संरचना र आकारले मात्र गुणस्तरीय र अन्तर्राष्ट्रिय स्तरको शिक्षा सुनिश्चित गर्दैन । प्राध्यापक–विद्यार्थीको सही अनुपात कायम गर्दै गुणस्तरीय शिक्षा र उच्च गुणस्तरका अनुसन्धान सामग्री प्रकाशनमा प्राध्यापक, विद्यार्थी तथा व्यवस्थापन सबै पक्ष थप सक्रिय हुन जरुरी छ ।”

समारोहमा विश्वविद्यालयका सहकुलपति एवम् शिक्षा, विज्ञान तथा प्रविधि मन्त्री महावीर पुनले दीक्षित विद्यार्थीहरूलाई आफ्नो प्राप्त ज्ञान र प्रविधिलाई चेतना, विश्वास, सद्भाव र समृद्धिसँग जोडेर अर्थतन्त्र विकासको माध्यम बनाउन र पछौटेपन, अशिक्षा र गरिबी विरुद्धको औजारको रूपमा प्रयोग गर्न आग्रह गरे ।