खोज

अर्घाखाँची, १० पुस ।

अर्घाखाँचीको सन्धिखर्क नगरपालिका–७ खाँचीकोटमा अवस्थित खाँचीकोट हिल स्टेशन पछिल्ला वर्षहरूमा आन्तरिक तथा बाह्य पर्यटकको आकर्षणको केन्द्र बन्दै गएको छ ।

यस स्थानबाट अन्नपूर्ण हिमशृङ्खला, धौलागिरि, माछापुच्छ्रे लगायतका हिमालहरूदेखि आसपासका गाउँ तथा खोंचका मनोरम दृश्य एकै ठाउँबाट अवलोकन गर्न सकिने भएकाले पर्यटकहरूको आकर्षण बढ्न थालेको वडा अध्यक्ष चुराबहादुर केसीले बताए ।

खाँची हिल स्टेसनमा पुग्ने पर्यटकलाई लक्षित गरी खानेपानीको टङ्की निर्माण गर्न पानी बोक्न खच्चरको प्रयोग गरिएको छ । हिल स्टेसनमा पर्याप्त पानी नभएपछि खानेपानी टङ्की निर्माण गर्न खच्चरमालाई पानी बोकाएर खानेपानी टङ्की निर्माण गर्न सुरु गरिएको छ ।

पञ्चासेमा मुल रहेको खानेपानी त्यो भन्दा माथि रहेको खाँची हिल स्टेसनमा पुराउन लुम्बिनी प्रदेश सरकारले विनियोजन गरेको २० लाख रुपैयाँको बजेटमा लिफ्टिङ विधिबाट खानेपानीको योजना सञ्चालन गरिएको वडा अध्यक्ष केसीले जानकारी दिनुभयो ।

मोटर बाटो नपुगेको स्थानमा खानेपानी टङ्की निर्माण गर्न दैनिक ७ वटा खच्चरले पानी बोकेर निर्माणको काम भइरहेको छ । डोल्पाबाट हिँडेका ७ वटा खच्चर जाजरकोट, रुकुम पश्चिम, रोल्पा, प्युठान हुँदै अर्घाखाँचीको हिल स्टेसनमा आउन १५ दिन लागेको हो ।

पञ्चासेमा मुल रहेको र सो स्थानबाट टङ्की निर्माण हुन थालेको छोर्लेकमा ७ वटा खच्चरले दैनिक ५ पटक पानी लैजान्छन् । एउटा खच्चरले एक पटकमा ७० लिटर लैजाने गर्दछ । एक वटा खच्चरको दैनिक ५ हजार रुपैयाँमा पानी बोकाएर खानेपानी टङ्की निर्माणको काम भइरहेको खानेपानी उपभोक्ता समितिका अध्यक्ष डुकबहादुर खत्रीले बताएका छन् ।

यसरी पानी बोकाउँदा झन्डै एक लिटर पानीको १० रुपैयाँ पर्ने गरेको छ । खाँचीकोट क्षेत्र पुरानो ऐतिहासिक तथा सांस्कृतिक महत्त्व बोकेको स्थानसमेत मानिन्छ । हिल स्टेसनसम्म पुग्न सहज बन्दै जाँदा अर्घाखाँचीको नयाँ पर्यटकीय गन्तव्यको रूपमा यसको प्रवर्द्धन हुने अपेक्षा गरिएको छ ।

सन्धिखर्क नगरपालिका, लुम्बिनी प्रदेश सरकार र पर्यटनसँग सम्बन्धित निकायले खाँचीकोटलाई व्यवस्थित रूपमा विकास गर्न योजना अघि सारिरहेका छन् । पर्यटन विकाससँगै रोजगारी वृद्धि र स्थानीय अर्थतन्त्रमा प्रत्यक्ष लाभ पुग्ने विश्वास नगरपालिकाले गरेको सन्धिखर्क नगरपालिकाका नगर प्रमुख कृष्ण प्रसाद श्रेष्ठले बताउनुभयो । सुपा देउरालीमा आएका पर्यटकलाई लक्षित गरेर विभिन्न संरचना निर्माण भइरहेको नगर प्रमुख श्रेष्ठको भनाइ छ ।

प्राकृतिक सुन्दरता, भौगोलिक विविधता र सांस्कृतिक सम्पदा एकै ठाउँमा समेटिएको खाँचीकोट आगामी दिनमा अर्घाखाँची जिल्लाको पहिचान बन्ने अपेक्षा गरिएको छ ।