खोज

पाल्पा, १० पुस । 

धार्मिक दृष्टिकोणबाट अत्यन्तै महत्त्वका साथ लिइएको रिब्दीकोट गाउँपालिकामा पर्ने ऐतिहासिक भैरव मन्दिर आर्थिक अनियमिततासँगै राजनैतिक खिचातानीमा बल्झिन पुगेको छ ।

स्थानीय सरकारसँगै केही राजनैतिक दलका कारण विगत ६ महिनादेखि नेतृत्व विहीन भएका कारण आर्थिक क्षेत्रमा यतिखेर व्यापार रूपमा प्रश्न उठ्न लागेको स्थानीयहरू बताउँछन् । स्थानीय सरकारको सङ्घीय कानुनसँग बाझिने गरी मठमन्दिर संरक्षणका लागि ऐन ल्याई मौजुदा व्यवस्थापन समिति विघटन गरी नयाँ नेतृत्वको चयन पछिको समयमा मन्दिरमा दर्शनार्थीद्वारा अर्पण गरेको भेटी माथि नै प्रश्न उठ्ने गरी आर्थिक अनियमितता भएको हो ।

स्थानीय सरकारले स्थानीय दिलीप रायमाझीको नेतृत्वमा गठित समितिमाथि सम्मानित अदालतले कानुन सम्मत नभएको भन्दै नयाँ नेतृत्व माथि प्रश्न उठाउँदै बदर गरी दिएपछि व्यवस्थापन समिति विहीन भए पनि दैनिक प्रशासनिक कार्य गर्दै आएको थियो ।

मन्दिरमा दर्शनार्थी बाट पाँच देखि २० हजार रुपैयाँ दैनिक जम्मा हुने गरेको र सङ्कलित रकम बैङ्क खातामा जम्मा नगरी आफूखुसी खर्च गरेका कारण बदमासी भएको पूर्व समितिका एक सदस्यले बताए ।  मन्दिरमा दर्शनका लागि आएका दर्शनार्थीले नगद सँगै जिन्सी पनि चढाउने गर्दछन् । त्यसै गरी यहाँ बली चढाए पछि टाउको बिक्री गर्ने परम्परा रहेको छ ।

त्यसको रकम देखि अन्य सङ्कलित रकम बैङ्कमा जम्मा नगरी व्यवस्थापक देखि स्थानीय सरकारद्वारा गठित समितिले आफूखुसी खर्च गरेको प्रकरण नै अहिलेको मुख्य मुद्दा भएको अदालतद्वारा वाहाली भएका अध्यक्ष गोबिन्द पोखरेल बताउँछन् ।

धार्मिक संस्था माथि स्वार्थ बाझिँदा समस्या भयो । मन्दिर दोहन गरी कमाइ खाने मुख्य माध्यम बन्दा स्थानीय सरकारको संरक्षण हुनु अत्यन्तै लज्जा बोधकको विषय बन्यो । छानबिन गर्न पनि स्थानीय सरकारका प्रमुख देखि वडा अध्यक्ष सम्म बाधक भएको स्थानीयहरूको भनाइ रहेको छ । पुरानो समितिको पदावधि सकियो ।

नयाँ समिति गठन गर्नुको सट्टामा पुरानै अध्यक्ष माथि स्थानीय सरकारको प्रमुखको अडानका कारण सर्व सम्मत रूपमा नेतृत्व चयन हुन नसकेको स्थानीय कमल पौडेल बताउँछन् । दलीय र व्यक्तिको स्वार्थका कारण अध्यक्ष पदका लागि कृष्ण नेपाल, दिलीप रायमाझी विरेन्द्र मिधुन र गोविन्द पोखरेलले अध्यक्षको लागि घोषणा गरेका छन् ।

सचिवका लागि मधु सुदन अधिकारी माधव ढकाल, धिरेन्द्र प्रधान र ओम बहादुर रानाले उमेद्वारी घोषणा गरेका छन् ।

कोषाध्यक्षका लागि विष्णु प्रसाद खनाल, शिव पोखरेलले उमेदवारी घोषणा गरेका छन् । पुरानो हिसाब अहिले सम्म समितिबाट अनुमोदन नभएको र पुरानो हिसाब नखोज्ने सर्तमा गोविन्द पोखरेललाई अध्यक्ष स्वीकार गर्ने जनप्रतिनिधिको धनाई बाहिरिए पछि थप रहस्यमय बन्दै गएको छ ।