खोज

नेपालगञ्ज, ८ पुस ।

आन्य दिनको तुलनामा मंगलवार अझ बढी शितलहर र बाक्लो कुहिरोका काराण नेपालगञ्ज विमानस्थल ठप्प भएको छ । शितलहर र बाक्लो कुहिरोका कारण भिजिबिलिटी नपुग्दा मङ्गलवार दिनभर नेपालगन्ज विमानस्थलबाट कुनै पनि हवाई उडान हुन सकेन । नागरिक उड्डयन कार्यालय नेपालगन्जका अनुसार मङ्गलवार बिहानैदेखि लागेको बाक्लो हुस्सु, कुहिरो र चलेको शीतलहरका कारण विमानस्थल बन्द रहँदा सबै उडान अवरुद्ध भएका हुन् ।

हुस्सु र कुहिरोका कारण ४०० देखि ६०० मिटर मात्र भिजिबिलिटी कायम रहेकाले विमानस्थल बन्द राखिएको र सोही कारण नेपालगन्जबाट पहाडी जिल्ला तथा काठमाडौंका लागि हुने कुनै पनि उडान मङ्गलवार सञ्चालन हुन नसकेको नागरिक उड्डयन कार्यालय नेपालगन्जले जनाएको छ ।

विमानस्थल टावरका अनुसार हवाई उडानका लागि आवश्यक भिजिबिलिटी नपुग्दा उडान सुरु गर्न नसकिएको हो । टावरले दिएको जानकारीअनुसार जहाज उडाउन कम्तीमा एक हजार मिटर भिजिबिलिटी आवश्यक पर्ने र जहाज अवतरणका लागि एक हजार ६०० मिटर भिजिबिलिटी हुनुपर्नेमा मङ्गलबार दिउँसो १ बजेर ५० मिनेटसम्म ६०० मिटरभन्दा बढी भिजिबिलिटी नपुगेकाले उडान सम्भव हुन नसकेको हो ।

विमानस्थल बन्द रहेकाले नेपालगन्जबाट पहाडी जिल्लाका लागि बिहान हुने सबै उडान पनि रद्द गरिएका छन् भने काठमाडौंका लागि हुने सबै उडान अवरुद्ध भएका छन् । यसअघि सोमवार पनि दिउँसो १ बजेर ३० मिनेटपछि मात्र विमानस्थल खुलेको थियो, त्यसअघि बिहानका सबै उडान अवरुद्ध भएका थिए । मंगलवार नेपालगञ्जमा एकपटकपनि घामको झुल्को देखिएको छैन ।

नेपालगन्जका लागि काठमाडौंबाट बिहान ७ बजेर २० मिनेटमा बुद्ध एअरको जहाज उड्ने नियमित तालिका भए पनि विमानस्थल बन्द रहेकाले हालसम्म पनि जहाज उड्न नसकेको बुद्ध एअर नेपालगन्जका प्रमुख विनीतविक्रम शाहले जानकारी दिए ।

उनका अनुसार नेपालगन्ज विमानस्थल खुलेपछि मात्र काठमाडौंबाट जहाज उडाइने छ । हाल नेपालगन्जबाट काठमाडौंका लागि श्री एयरलाइन्सले चार, बुद्ध एयरलाइन्सले चार र यति एयरलाइन्सले दुई वटा नियमित उडान गर्दै आएका छन्। त्यस्तै नेपालगन्जबाट पहाडी जिल्लातर्फ पनि बिहानका समयमा बढी उडान हुने गरेका छन् । नेपालगन्जबाट हवाई उडान अवरुद्ध भएपछि काठमाडौं तथा पहाडी जिल्लातर्फ यात्रा गर्ने यात्रुहरू समस्यामा परेका छन् ।