खोज

बुटवल ।

जिल्ला ट्राफिक प्रहरी कार्यालय अर्घाखाँचीले सडकमै चालक तथा सहचालकलाई ट्राफिक नियमसम्बन्धी प्रशिक्षण दिन थालेको छ । जिल्ला ट्राफिक प्रहरी कार्यालय अर्घाखाँचीका प्रमुख सरोज केसी स्वयं सडकमा खटिएर चालक र सहचालकलाई ट्राफिक नियमबारे प्रशिक्षण दिएका हुन् ।

सोमबार गोरुसिङ्गे–सन्धिखर्क सडकखण्डअन्तर्गत सुपा देउराली लाहुरे बजार क्षेत्रमा क्षमताभन्दा बढी लोड बोकेका टिप्परहरूलाई कारबाही गर्दै दुर्घटना न्यूनीकरणका लागि चालक र सहचालकलाई प्रशिक्षणसमेत दिइएको प्रहरीले जनाएको छ ।

ट्राफिक प्रमुख केसीले ओभरलोड बोक्ने टिप्परबाट ढुङ्गा झार्दै कुनै पनि सवारी साधनले क्षमताभन्दा बढी सामान ढुवानी गर्दा सडक संरचनामा क्षति पुग्ने, सवारी साधन अनियन्त्रित भई दुर्घटना हुन सक्ने जोखिम रहने बताए । उनले क्षमताभन्दा बढी सामान ढुवानी नगर्न चालक तथा सहचालकलाई आग्रह गरे ।

केसीले अब क्षमताभन्दा बढी लोड बोक्ने चालक र सहचालकमाथि कडा कारबाही गरिने चेतावनी दिए । सोमबार बिहान सडकमा गरिएको अनुगमनका क्रममा १५ वटा सवारी साधनले क्षमताभन्दा बढी ढुङ्गा बोकेको पाइएपछि टिप्परको छतमा चढेर आफै ढुङ्गा झार्दै नियम विपरीत काम गर्ने जुनसुकै सवारी धनी, चालक तथा सहचालकलाई कारबाही गरिने उनले बताए ।

जिल्ला ट्राफिक प्रहरी कार्यालय अर्घाखाँचीका अनुसार गत आर्थिक वर्ष २०८१/८२ मा मादक पदार्थ सेवन (मापसे) कसुरमा ४६ जनालाई कारबाही गरिएको थियो भने २३ हजार रुपैयाँ राजस्व संकलन गरिएको थियो ।

यस्तै, चालु आर्थिक वर्षको मंसिर महिनासम्म मापसेमा ९७ जनालाई कारबाही गरिएको र ५१ हजार रुपैयाँ राजस्व संकलन गरिएको ट्राफिक प्रमुख केसीले जानकारी दिए ।