खोज

चन्द्रौटा, ६ पुस

नेपाल इन्भेस्टमेन्ट मेगा बैंक चन्द्रौटा शाखाले आफ्नो सामाजिक उत्तरदायित्वमार्फत विद्यार्थीहरुलाई जुत्ता र मोजा वितरण गरेको छ । कपिलवस्तुको शिवराज नगरपालिका–७, जवाभारीमा रहेको शेष आधारभूत विद्यालयका एक सय जना विद्यार्थीलाई आइतबार सामग्री प्रदान गरिएको हो ।

बैंकले चिसो मौसमका कारण विद्यार्थीहरुलाई पठनपाठनमा पर्ने असरलाई ध्यानमा राख्दै सहयोग गरिएको चन्द्रौटा शाखाका प्रबन्धक नारायण पन्थीले बताए । उनले साना–साना सहयोगले पनि विपन्न परिवारका बालबालिकालाई ठूलो राहत पुग्ने उल्लेख गर्दै यसले विद्यार्थीहरुको नियमित विद्यालय उपस्थितिमा समेत सकारात्मक प्रभाव पार्ने विश्वास व्यक्त गरे ।

“बैंकले नाफामात्र होइन, समाजप्रतिको दायित्व पनि वहन गर्नुपर्छ भन्ने मान्यताअनुसार यस्ता कार्यक्रम गर्दै आएका छौं,” उनले भने । शाखा प्रबन्धक पन्थीका अनुसार विगतका वर्षहरुमा पनि बैंकले छात्रवृत्ति वितरण, शैक्षिक सामग्री सहयोग लगायतका सामाजिक कार्यक्रम निरन्तर गर्दै आएको छ । आगामी दिनमा पनि शिक्षा, स्वास्थ्य र समुदाय लक्षित कार्यक्रमलाई प्राथमिकतामा राख्ने उनले जनाए ।

यस्तै शिवराज नगरपालिका वडा नम्बर–७ का वडा अध्यक्ष अनुप कुमार चौधरीले जाडो मौसममा ग्रामिण क्षेत्रका विद्यार्थीहरुले भोग्नुपरेको समस्यामा मल्हम लगाउने काम बैंकले गरेको बताए । ग्रामिण भेगका विपन्न परिवारका बालबालिकालाई जाडोमा विद्यालय जान कठिन हुन्छ, त्यही अवस्थालाई मध्यनजर गर्दै यस विद्यालयलाई छनोट गरिएको उनले बताए । यस्ता सहयोगी कार्यक्रम अन्य संघ–संस्थाले पनि अनुशरण गर्नुपर्नेमा वडा अध्यक्ष चौधरीले जोडदिए । प्रधानाध्यापक रन्जान कुमारी चौधरीले बैंकको सहयोगलाई सराहनीय कार्यको प्रशंसा गर्दै धन्यवाद व्यक्त गरिन् । यस प्रकारको सहयोगले विद्यार्थीहरुको मनोबल बढ्नुका साथै अभिभावकलाई पनि राहत मिल्ने उनको दावी छ ।