खोज

नेपालगञ्ज, ७ पुस ।

पुस लागेसँगै बाँकेमा बाक्लो हुस्सु र अत्यधिक चिसो बढेपछि जनजीवन कष्टकर बन्दै गएको छ । बिहानैदेखि शितलहरसँगै चिसो हावा चल्दा सर्वसाधारण घरभित्रै बस्न बाध्य भएका छन् ।

पछिल्ला छ दिनदेखि घाम नलाग्दा चिसो झन् बढेको छ । थरथर कपाउने जाडोले दैनिक ज्याला मजदुरी गरेर जीविकोपार्जन गर्ने कामदारहरूलाई बढी समस्या परेको छ । हुस्सुका कारण दिउँसो पनि सडकमा सवारी साधनको आवागमन कम भएको छ । ट्राफिक प्रहरीले हुस्सु लागेका बेला दिउँसोसमेत बत्ती बालेर सवारी चलाउन चालकहरूलाई अनुरोध गरेको छ ।

चिसो बढेसँगै बाँकेका अस्पतालमा रुघा, खोकी, दम, ज्वरो र निमोनियाका बिरामीको संख्या पनि बढ्दै गएको अस्पतालहरूले जनाएका छन् । भेरी अस्पतालका वरिष्ठ फिजिशियन डाक्टर. राजन पाण्डेले अहिले अस्पतालमा दमका बिरामी बढी आउने गरेको जानकारी दिए ।

जाडोयाम सुरु भएसँगै विभिन्न श्वासप्रश्वास तथा ज्वरोसम्बन्धी बिरामीको संख्या बढ्दै गएको उनले बताए । डाक्टर पाण्डेले दीर्घरोगी, बालबालिका र वृद्धवृद्धालाई विशेष सावधानी अपनाउन आग्रह गर्दै न्यानो कपडा लगाउन, अत्यावश्यक कामबाहेक घरबाहिर ननिस्किन सुझाव दिए । साथै बन्द कोठाभित्र कोइलाको आगो वा हिटर प्रयोग नगर्नसमेत चेतावनी दिए ।

बाँकेका प्रमुख जिल्ला अधिकारी दिलकुमार तामाङले चिसोबाट बच्ने उपायका विषयमा विपद् पूर्वतयारी समितिको बैठक बसिरहेको जानकारी दिए । उनले अगो ताप्न आवश्यक दाउरा उपलब्ध गराउन डिभिजन वन कार्यालय बाँकेलाई पत्राचार गरिएको र सबै स्थानीय तहलाई पनि नागरिकका लागि आगो ताप्ने व्यवस्था मिलाउन आग्रह गरिएको बताए ।