खोज

चन्द्रौटा, ५ पुस ।

कपिलवस्तुको शिवराज नगरपालिकामा थारु समुदायका विद्यार्थीहरूका लागि नगर स्तरीय हाजिरी जवाफ प्रतियोगिता हुने भएको छ । थारु कल्याण कारिणी सभा शिवराज नगर समितिको आयोजनामा यही पुस १० गते उक्त प्रतियोगिता हुन लागेको हो ।

विद्यार्थीहरूको बौद्धिक क्षमता अभिवृद्धि तथा अध्ययनप्रति रुचि बढाउने उद्देश्यले कार्यक्रम आयोजना गरिएको थारु कल्याण कारिणी सभा शिवराज नगर समितिका सभापति प्रकाश चौधरीले बताए । पछिल्लो समय विशेष गरी थारु समुदायका विद्यार्थीहरूमा विद्यालय छाड्ने प्रवृत्ति बढ्दै गएकोप्रति चिन्ता व्यक्त गर्दै त्यसलाई न्यूनीकरण गर्न यो पहल गरिएको उनले बताए ।

हाजिरी जवाफ प्रतियोगिताले विद्यार्थीहरूलाई पढाइप्रति लगनशील बनाउने, प्रतिस्पर्धात्मक भावना विकास गर्ने र आत्मविश्वास बढाउने विश्वास आयोजक संस्थाले लिएको छ । प्रतियोगितामा नगरभित्रका विभिन्न विद्यालयका थारु विद्यार्थीहरूको सहभागिता रहने जनाइएको छ ।

सभापति थारुका अनुसार प्रतियोगितामा सहभागी हुन निम्न नियम पालन गर्नुपर्नेछ ।
१. प्रत्येक गाउँको बरघर र विद्यार्थी समूह अनिवार्य उपस्थित हुनुपर्ने ।
२. सहभागी विद्यार्थी अनिवार्य रूपमा विद्यालय पोसाकमा उपस्थित हुनुपर्ने ।
३. सहभागी कक्षा ६ देखि कक्षा १० सम्मको प्रत्येक कक्षाबाट १/१ जना पर्नेगरि ५ जना मात्र सहभागिता गराउनुपर्ने। (५ जना मध्ये २ जना महिला अनिवार्य)
४. प्रतियोगितामा थारु विद्यार्थीलाई मात्र सहभागिता गराइने ।
५. प्रश्नहरू विद्यालयको पाठ्यपुस्तक, स्थानीय संस्कृति र वर्तमान समसामयिक विषयवस्तुमा आधारित हुनेछन् ।