बर्दघाट ।
बर्दघाट चुरे उद्यान क्षेत्रमा स्थानीय बासिन्दा र सशस्त्र प्रहरीको संयुक्त श्रमदान कार्यक्रम गरिएको छ। पूर्व–पश्चिम राजमार्गअन्तर्गत त्रिवेणी चोकबाट उत्तरतर्फको बन क्षेत्र हुँदै करिब ४ किलोमिटर दूरीमा रहेको कैलाशधामसम्म पुग्ने गोरेटो मार्ग निर्माणका लागि श्रमदान गरिएको हो।
लामो समयदेखि स्थानीय युवाहरूको पहलमा उक्त गोरेटो मार्गको निर्माण तथा सौन्दर्यीकरण हुँदै आएको छ। आन्तरिक पर्यटनको उच्च सम्भावना बोकेको यस क्षेत्रलाई व्यवस्थित र आकर्षक बनाउन स्थानीय सरकार युवाहरूसँग हातेमालो गर्दै अघि बढेको बर्दघाट नगरपालिकाका नगरप्रमुख शम्भुलाल श्रेष्ठले बताए ।
नगरप्रमुख श्रेष्ठका अनुसार, प्राकृतिक सुन्दरता, शान्त वातावरण र धार्मिक महत्त्व बोकेको कैलाशधाम क्षेत्रको प्रवर्द्धनले बर्दघाटलाई आन्तरिक पर्यटनको गन्तव्यका रूपमा विकास गर्न मद्दत पुग्नेछ।
स्थानीय बासिन्दाहरूले बजारको कोलाहलपूर्ण जीवनबाट राहत लिँदै प्रकृतिको नजिक पुग्नका लागि यो क्षेत्र अत्यन्तै उपयुक्त भएको प्रतिक्रिया दिएका छन्। पछिल्लो समय बिहानको समयमा मर्निङ वाक गर्नेहरूको संख्या समेत उल्लेख्य रूपमा बढ्दै गएको उनीहरूको भनाइ छ।
आज बिहानै सम्पन्न श्रमदान कार्यक्रममा सशस्त्र प्रहरी महाविद्यालय (तालिम केन्द्र) का करिब १५० भन्दा बढी सुरक्षाकर्मीको सहभागिता रहेको थियो। श्रमदानका क्रममा झाडी सरसफाइ तथा ट्याक (गोरेटो) निर्माणको काम गरिएको छ।
६ पुष २०८२, आइतबार
