खोज

बुटवल ।

भैरहवा विमानस्थल बाक्लो हुस्सुका कारण नखुल्दा रास्वपा सभापति रवि लामिछानेलाई भरतपुर हुँदै रुपन्देहीतर्फ लगिएको छ । लामिछाने सवार बुद्ध एयरको जहाज त्रिभुवन अन्तर्राष्ट्रिय विमानस्थलबाट चितवनको भरतपुर उडेको हो ।

केन्द्रीय कारागारका डीएसपी जेसी शाहले लामिछानेलाई लिएर गएका हुन् । शुक्रबार बिहान ८ बजे नै विमानस्थलमा उपस्थित गराइए पनि भैरहवाको मौसम नखुलेको कारण लामो समयसम्म लामिछाने विमानस्थलमा रोकिएका थिए ।

बिहीबार उच्च अदालत तुलसीपुर, बुटवलका न्यायाधीश वासुदेव आचार्य र तेजनारायण पौडेलको इजलासले उनलाई तीन सर्त पुरा गरेर छाड्न आदेश दिएको थियो । आदेशको अन्तिम बुँदामा रविलाई कागज गर्नुपर्ने विषय उल्लेख छ ।

उच्च अदालतको आदेश अनुसार लामिछानेले रुपन्देही जिल्ला अदालतमा उपस्थित भएर कागज गर्नुपर्ने भएपछि उनलाई ललितपुरको नख्खु कारागारबाट रुपन्देहीतर्फ लगिएको हो ।

उच्च अदालतको आदेशमा भनिएको छ, ‘फैसला हुँदा बिगोको हकमा थप दायित्व सिर्जना भएमा तिर्न बुझाउन मन्जुर भए, सोको कागज गरी प्रस्तुत मुद्दाबाट थुनामुक्त गर्नु ।’ रुपन्देही जिल्ला अदालतका तहसिलदार कृष्णप्रसाद पौडेलले  बताए, ‘उहाँलाई उपस्थित गराएर कागज गरेपछि मात्र थुनामुक्त गर्न सकिन्छ ।’

बुटवलस्थित सुप्रिम सहकारीको रकम अपचलनमा संलग्न कसुरमा लामिछानेले यसअघि २०८१ माघमा १ करोड रुपैयाँ धरौटी राखेका थिए । सो धरौटी फुकुवा भइसकेकोले उनले फेरि धरौटी रकम जम्मा गर्नुपर्नेछ ।

लामिछानेले बिगोको हकमा दामासाहीले हुने रकम सुनिश्चितता गर्ने भन्दै बैंक जमानतसहित उच्च अदालतमा निवेदन दिएका थिए । उच्च अदालतले सो निवेदन सर्तसहित स्विकार्ने आदेश दिएको हो ।

निवेदनसाथ पेस गरिएको बैंक जमानत २ करोड ७४ लाख ८४ हजार रकम प्रमाणीकरण गरेर सनाखत गरेपछि लामिछाने रिहा हुनेछन् । उच्च अदालतले उनलाई विदेश यात्रा गर्नु परेमा पूर्व जानकारी दिनुपर्ने आदेश पनि दिएको छ ।