खोज

चन्द्रौटा, ०४ पुस ।

लुम्बिनी प्रदेश सभा सदस्य इन्द्रजित थारुले निःशुल्क शिक्षा कार्यान्वयन नगर्ने स्थानीय सरकार आफ्नो दायित्व नबुझेको बताएका छन् ।

लुम्बिनी प्रदेशमा सार्वजनिक शिक्षामा लगानी, अवस्था, चुनौती र अवसर: प्रदेश स्थानीय सरकार तथा नागरिक समाजको भूमिका बहस–संवाद कार्यक्रम सम्बोधन गर्दै उनले यस्तो बताएका हुन् ।

दाङको भालुवाङमा बुधबार भएको कार्यक्रममा बोल्दै सरकारले माध्यमिक तहसम्म निःशुल्क शिक्षाको संवैधानिक व्यवस्था रहेको उनले बताए ।

निःशुल्क शिक्षा कार्यान्वयन नगर्ने पालिका भद्रगोल रहेको बताउँदै आम नागरिकको बालबालिकाहरू सम्मानजनक रूपमा शिक्षा आर्जन गर्न पाउनुपर्ने सदस्य थारुले बताए ।

भौतिक पूर्वधारलाई मात्रै विकास ठानेका कारण शिक्षाले गति लिन नसकेको उनले बताए । शिक्षामा गरिएको लगानी दीर्घकालीन विकासको आधार भएको बताउँदै आम नागरिकहरू समेत शिक्षाको पहुँचमा हुनुपर्ने थारुले उल्लेख गरे ।

स्थानीय सरकारहरूले विद्यालयको भौतिक संरचना निर्माणसँगै शिक्षकको क्षमता अभिवृद्धि, शैक्षिक गुणस्तर सुधार र विद्यार्थीमैत्री वातावरण निर्माणमा ध्यान दिनुपर्ने उनले बताए ।

“संविधानले दिएको अधिकार व्यवहारमा उतार्न प्रदेश र स्थानीय सरकारसँगै अभिभावक, शिक्षक र नागरिक समाजको साझा जिम्मेवारी छ”  थारुले भने । नागरिक समाजको भूमिका महत्त्वपूर्ण रहेको बताउँदै शिक्षा क्षेत्रको निगरानी, सकारात्मक दबाब र सहकार्य बिना निःशुल्क गुणस्तरीय शिक्षा सम्भव नहुने उनले बताए ।

यसैबिच सामाजिक विकास मन्त्रालयका वरिष्ठ शिक्षा अधिकृत बेगम केसीले सार्वजनिक विद्यालयप्रति आम नागरिकको भरोसा बढाउन सरकार गम्भीर हुनुपर्ने बताए ।

निःशुल्क शिक्षालाई नारामा सीमित नगरी व्यवहारमा पूर्ण रूपमा कार्यान्वयन गर्न सबै तहका सरकारलाई उनले आग्रह गरे । यस्तै जिल्ला समन्वय समिति कपिलवस्तुका संयोजक बाबुराम आचार्यले निजी विद्यालयमुखी सोच अन्त्य नगरेसम्म सार्वजनिक शिक्षा सबल नहुने उल्लेख गरे ।

कार्यान्वयन गर्न निकायमा नरहेको बताउँदै तर शिक्षालाई प्रभावकारी रूपमा गुणस्तरीयता प्रदान गर्न समन्वयमा कन्जुसाई नगर्ने उनले बताए ।

एसएसडिसीको आयोजना र एक्सन एड सहयोगमा लुम्बिनी प्रदेशमा सार्वजनिक शिक्षामा लगानी, अवस्था, चुनौती र अवसर: प्रदेश स्थानीय सरकार तथा नागरिक समाजको भूमिका बहस–संवाद कार्यक्रममा लुम्बिनी प्रदेशका सामाजिक विकास मन्त्रालय निम्ति सचिव दिवाकर भण्डारी, शुद्धोदन गाउँपालिकाका अध्यक्ष कमलेश शरण चौधरीले शिक्षा क्षेत्रलाई प्रभावकारी रूपमा विकास गर्नुपर्नेमा जोड दिएका थिए ।

शिवराज नगरपालिकाका उपसचिव पूर्ण बहादुर विश्वकर्माले शिक्षाको अवसर, सम्भवना र चुनौतीका विषयमा प्रशिक्षण दिएका हुन् ।

सिद्धार्थ सामाजिक विकास केन्द्रका पूर्व अध्यक्ष पोम नारायाण पौडेल, शिक्षाका लागि राष्ट्रिय अभियान नेपालका केन्द्रीय हरि अधिकारी, एनसिईका कपिलवस्तु जिल्ला संयोजक बाबुराम रायमाझी र दाङ्ग जिल्लाका संयोजक रूपलाल चौधरी लगायतले कार्यक्रमलाई सम्बोधन गरेका थिए ।