खोज

रुपन्देही ।

रुपन्देहीको कञ्चन गाउँपालिका–३ धौलागिरी चोकमा एक १७ वर्षीय किशोरको शव नालीमा फेला परेको छ । मृतक कञ्चन–३ निवासी ईशान शर्मा पौडेल भएको पहिचान गरिएको छ । ईशान तेक्वान्दोका खेलाडीसमेत रहेका थिए ।

प्रहरीका अनुसार ईशान बुधबार साँझ करिब ८ बजेदेखि सम्पर्कविहीन थिए । खोजतलासका क्रममा घर नजिकै रहेको नालीमा उनको शव फेला परेको हो । प्रारम्भिक अनुसन्धानबाट ईशानको हत्या भएको आशंका गरिएको छ ।

स्थानीयवासीका अनुसार केही दिनअघि विद्यालय परिसरमा एउटै युवतीको विषयलाई लिएर ईशान र उनका साथीहरूबीच विवाद भएको थियो । सोही विवादकै कारण हत्या भएको हुनसक्ने आशंका गरिएको भए पनि यस विषयमा विस्तृत अनुसन्धान भइरहेको प्रहरीले जनाएको छ ।

रुपन्देही प्रहरीका सूचना अधिकारी सुरज कार्कीका अनुसार घटनास्थल आसपासको क्षेत्रमा निगरानी बढाइएको छ र विभिन्न कोणबाट अनुसन्धान भइरहेको छ । “दोषी पहिचान गरी छिटो पक्राउ गर्न अनुसन्धान तीव्र पारिएको छ,” उनले बताए ।

कञ्चन–३ का वडा सदस्य तथा मृतकका छिमेकी दीपक अधिकारीले केही दिनअघि विद्यालय परिसरमा ईशान र साथीहरूबीच विवाद भएको कुरा सुनिएको बताए । “उनी कुनै कुलतमा लागेको जानकारी हामीलाई थिएन । आफ्ना कुरामा अडिग रहने स्वभावका थिए,” अधिकारीले भने, “युवतीको विषयमा विवाद भएको सुनिएको छ, तर यथार्थ प्रहरी अनुसन्धानबाट खुल्नेछ ।”

अधिकारीका अनुसार घटनाको दिन ईशान साँझ जिम जान घरबाट निस्केका थिए । उनीसँगै जिमबाट बाहिर निस्केका एक जना साथीलाई प्रहरीले नियन्त्रणमा लिएको छ । हालसम्म अनुसन्धानका लागि तीन जनालाई प्रहरीले नियन्त्रणमा लिएको जनाएको छ ।

स्थानीयका अनुसार मृतकको शव घरबाट करिब १५० मिटर दूरीमा रहेको नालीमा फालिएको अवस्थामा भेटिएको थियो । टाउकोको पछिल्लो भागमा चोट देखिएको र घटनास्थलमा धेरै रगत नदेखिएकाले अन्यत्र हत्या गरी शव नालीमा फालिएको हुनसक्ने अनुमान गरिएको छ । समूह मिलेर आक्रमण गरिएको हुनसक्ने आशंकासमेत गरिएको छ ।

मृतक ईशानकी आमा गाउँमै ब्यूटी पार्लर सञ्चालन गर्दै आएकी छन् । तर, घटनाको दिन उनी घर बाहिर रहेको बताइएको छ ।

घटनाले स्थानीय क्षेत्रमा त्रास फैलिएको छ । स्थानीयवासीहरूले दोषीलाई छिटो पक्राउ गरी कडा कारबाही गर्न माग गरेका छन् ।