खोज

नेपालगञ्ज, २ पुस ।

जेन जी आन्दोलनले महिला जनप्रतिनिधिहरूको सोच, कार्यशैली र निर्णय प्रक्रियामा पारेको प्रभावबारे नेपालगन्जमा गहन र अर्थपूर्ण बहस भएको छ । सञ्चारिका समूहको आयोजनामा बुधवार आयोजित प्यानल डिस्कसन कार्यक्रममा बाँकेका स्थानीय तहका महिला जनप्रतिनिधि, प्रदेश सभा सदस्य, पूर्व मन्त्री, राजनीतिक विश्लेषक तथा जेनजी युवाहरू सहभागी भई अनुभव र दृष्टिकोण साटासाट गरेका थिए ।

“जेनजी आन्दोलनपछि महिला जनप्रतिनिधिहरूको मनोविज्ञान” विषयमा केन्द्रित छलफलमा वक्ताहरूले युवा पुस्ताको बढ्दो सचेतना, सामाजिक सञ्जालमार्फत उठ्ने प्रश्न र दबाबले महिला नेतृत्वलाई अझ उत्तरदायी, पारदर्शी र संवेदनशील बनाउँदै लगेको धारणा व्यक्त गरे । युवाको आवाजले नेतृत्वलाई आत्ममूल्यांकनतर्फ उन्मुख गराएको उनीहरूको भनाइ थियो ।

कार्यक्रममा कोहलपुर नगरपालिकाकी उप–प्रमुख सङ्गीता सुवेदीले जेन्जी आन्दोलनले जनप्रतिनिधिहरूलाई जनतासँग प्रत्यक्ष संवादमा उभिन बाध्य बनाएको बताइन् । “आजका युवाले तत्काल जवाफ र स्पष्टता खोज्छन्, त्यसैले नेतृत्वको सोच र व्यवहारमा परिवर्तन आउनु स्वाभाविक हो,” उनले भनिन् ।

कोहलपुर नगरपालिका–११ की वडाध्यक्ष कल्पना शर्माले महिला जनप्रतिनिधिहरू आलोचनालाई सकारात्मक रूपमा ग्रहण गर्न सिक्दै गएको उल्लेख गरिन् । उनका अनुसार जेन्जी आन्दोलनले नेतृत्वभित्र आत्ममूल्यांकन र सुधारको संस्कार विकास गरेको छ ।

पूर्व स्वास्थ्य राज्यमन्त्री हसिना खानले जेनजी आन्दोलनले महिला नेतृहरूलाई मानसिक रूपमा थप सशक्त बनाएको बताउँदै बदलिँदो सामाजिक परिवेशसँगै नेतृत्वले आफ्ना कार्यशैली परिमार्जन गर्नुपर्ने आवश्यकता औँल्याइन् । “समयसँगै नबदलिने नेतृत्व पछाडि पर्छ,” उनको भनाइ थियो ।

प्रदेश सभा सदस्य सुशिला बादीले युवाको सक्रिय सहभागिताले नीति निर्माणमा नयाँ दृष्टिकोण थपिएको उल्लेख गर्दै महिला नेतृत्वले युवासँग सहकार्य गर्दै अघि बढ्नुपर्ने धारणा राखिन् । राजनीतिक विश्लेषक अर्जुन पोखरेलले जेन्जी आन्दोलनलाई असन्तोषको अभिव्यक्ति मात्र नभई लोकतन्त्रलाई अझ मजबुत बनाउने चेतनाको संकेतका रूपमा लिनुपर्ने बताए ।

कार्यक्रमकी गेस्ट स्पिकर तथा जेनजी अभियन्ता प्रतिक्षा बस्नेतले युवाहरूको आन्दोलन सत्ता विरोधी मात्र नभई सुशासन, पारदर्शिता र जवाफदेहिताको माग भएको स्पष्ट पारिन् । उनले महिला नेतृत्वले युवाको आवाजलाई चुनौती होइन, अवसरका रूपमा बुझ्नुपर्नेमा जोड दिइन् ।

कार्यक्रमको सहजीकरण कान्तिपुरकी पत्रकार रुपा गहतराजले गरेकी थिइन् । अन्तरक्रियाले महिला नेतृत्व र युवा पुस्ताबिचको सम्बन्धलाई अझ सुदृढ बनाउँदै समावेशी, उत्तरदायी र संवादमुखी राजनीतिक अभ्यासतर्फ बहस अघि बढाएको आयोजकले जनाएको छ ।