खोज

अर्घाखाँची, ०२ पुस ।

सुपा देउराली मन्दिरमा उठेको भेटी तथा अन्य सामाग्रीको पारदर्शितामा सन्धिखर्क नगरपालिकाले चासो देखाएको छ ।

मन्दिर व्यवस्थापन समिति नभएको अबस्थामा मन्दिरमा पारदर्शिता अपनाउन सुपा देउराली मन्दिरमा उठेको भेटी तथा दानको रकमलाई पारदर्शी गराउने उद्देश्यका साथ सन्धिखर्क नगरपालिकाले सिसिटिभी जडान गरेको छ ।

सुपा मन्दिरमा राखेको सिसिटिभीलाई नगरपालिकाको कार्यालयबाट अनुगमन गर्न मिल्ने गरि जडान गरिएको नगर प्रमुख कृष्णप्रसाद श्रेष्ठले बताएका छन् ।

नेपालकै महत्त्वपूर्ण धार्मिक गन्तव्यका रूपमा १०० औँ स्थान भित्र पर्ने सुपा देउराली मन्दिरको धार्मिक महिमा बढ्दै गएको अवस्थामा पारदर्शिता आवश्यक रहेको नगर प्रमुख श्रेष्ठको भनाइ छ ।

मन्दिरमा व्यवस्थित किसिमको लकर जडान नहुँदासम्म दैनिक रूपमा सङ्कलन हुने भेटी तथा अन्य सामाग्री स्थानीय प्रहरी, सम्भव भएसम्म जनप्रतिनिधि र सरोकारवाला स्थानीय भद्र भलादमी सहितको उपस्थितिमा सि.सि.टि.भि क्यामेराको निगरानीमा भेटी सङ्कलन गरी दैनिक रूपमा वा भेटी सङ्कलन भएको भोलि पल्ट मन्दिरको नाममा रहेको बैङ्क खातामा दाखिला गरी सोको बैङ्क भौचर लिई आम्दानी राख्न नगर प्रमुख कृष्णप्रसाद श्रेष्ठले मन्दिरका लेखापाललाई पत्राचार गरेका छन् ।

मन्दिर संरक्षण समिति निर्माण नहुँदासम्म मन्दिर व्यवस्थापनमा खटिने पुजारी र अन्य आवश्यक व्यवस्थापकहरूलाई कुनै किसिमको पारिश्रमिक भेटी रकमबाट उपलब्ध नगराउने साथै निजहरूलाई आवश्यकता अनुसार कामकाजमा लगाइ दैनिक हाजिरी राख्ने र मन्दिर संरक्षण समितिको गठन पश्चात् पारिश्रमिक भुक्तानी गर्ने सुनिश्चितता सहित मन्दिरको आवश्यक कामकाजमा लगाउन नगरपालिकाले निर्देशन गरेको छ ।

मन्दिर संरक्षण समितिको गठन नहुँदासम्म मन्दिरलाई आर्थिक दायित्व सिर्जना हुने खालका कुनै पनि कार्य नगर्ने नगराउने साथै मन्दिरमा नियमित हुने पूजापाठको लागि आवश्यक पर्ने सामग्री मन्दिरको नाममा खरिद गरी लिने र मन्दिर संरक्षण समितिको गठन पश्चात् भुक्तानी गर्ने व्यवस्था मिलाउनु पर्नेछ ।

मन्दिरमा दैनिक रूपमा सङ्कलन हुने भेटीघाटी सोही दिन मन्दिरको वेव पेज लगायतका सामाजिक सञ्जाल मार्फत सार्वजनिक गर्ने व्यवस्था मिलाउन नगर प्रमुखले आग्रह गरेका छन् । मन्दिरमा चढाउने बलीको मुड (टाउको) सम्बन्धित पूजा गर्ने बलिदातालाई कुनै पनि शुल्क नलिई फिर्ता दिनुपर्ने छ ।