खोज

जितपुर, कपिलवस्तु

१६औं कपिलवस्तु महोत्सव तथा कृषि, पर्यटन र औद्योगिक प्रदर्शनी–२०८२ को प्रमुख आकर्षणका रूपमा रहेको १४औं कपिलवस्तु डान्स आइडलको उपाधि समृद्धि पन्तले जितेकी छिन्।बाणगंगा नगरपालिका–४ स्थित बुद्ध रंगशालामा सञ्चालन भएको फाइनल चरणको प्रतिस्पर्धामा समृद्धिले उत्कृष्ट नृत्य प्रस्तुति दिँदै फाइनलमा प्रवेश गरेका अन्य तीन प्रतिस्पर्धीलाई पछि पारेर उपाधि हात पार्न सफल भएकी हुन्। उपाधिसँगै उनले चाँदीको टोपीसहित नगद रु. १ लाख ३१ हजार १ सय ३१ रुपैयाँ, ट्रफी, मेडल तथा प्रमाणपत्र प्राप्त गरेकी छिन्।

प्रतियोगितामा खुशी थारुले द्वितीय स्थान हासिल गर्दै रु. ८१ हजार १८१, अप्रिता पोख्रेलले तृतीय स्थान प्राप्त गरी रु. ६१ हजार १६१ र गिताञ्जली मगरले सान्त्वना स्थान हासिल गर्दै रु. ३१ हजार १३१ नगद पुरस्कार प्राप्त गरेका छन्। उनीहरू सबैले नगद पुरस्कारसँगै ट्रफी, मेडल, प्रमाणपत्र तथा आकर्षक गिफ्ट पनि प्राप्त गरेका छन्।

आयोजकका अनुसार, फाइनलमा पुगेका यी चारै जना प्रतिस्पर्धीले राष्ट्रिय स्तरको म्युजिक भिडियोमा अभिनय गर्ने अवसर समेत प्राप्त गर्नेछन्, जसले उनीहरूको नृत्य यात्रालाई थप उचाइमा पुर्‍याउने अपेक्षा गरिएको छ।

डान्स आइडल प्रतियोगितामा प्रारम्भिक चरणबाट छनोट हुँदै १५ जना प्रतियोगीहरू अन्तिम चरणसम्म स्टेजमा उत्रिएका थिए। विभिन्न चरणमा निर्णायकहरूको मूल्याङ्कन, दर्शकको उत्साहजनक उपस्थिति र प्रतिस्पर्धीहरूको उत्कृष्ट प्रस्तुतिले कार्यक्रमलाई थप रोचक बनाएको थियो।

स्थानीय कला, संस्कृति र प्रतिभाको पहिचान तथा प्रवर्द्धन गर्ने उद्देश्यले आयोजना गरिएको कपिलवस्तु डान्स आइडलले युवाहरूमा नृत्यप्रतिको रुचि बढाउनुका साथै राष्ट्रिय स्तरमा आफ्नो प्रतिभा देखाउने अवसर प्रदान गर्दै आएको आयोजकले बताएका छन्।