खोज

काठमाडौँ ।

नेकपा एमालेको नेतृत्व छनोटका लागि मंगलबार अपराह्न ४ बजेदेखि मतदान सुरु हुने भएको छ । महाधिवेशनको बन्दसत्र हल भृकुटीमण्डपमा विद्युतीय भोटिङ मेशिनमार्फत मतदान गरिनेछ । मतदानका लागि आवश्यक सम्पूर्ण प्राविधिक तयारी पूरा भएको छ ।

यसअघि दिउँसो १ बजेदेखि मतदान सुरु हुने भनिए पनि प्राविधिक कारणले कार्यतालिका सरेको भोटिङ मेशिनका प्राविधिक नवराज पाण्डेले जानकारी दिए ।

पार्टीको ११औँ महाधिवेशनमा देशभरबाट २ हजार २६३ जना प्रतिनिधि सहभागी भएका छन् । महाधिवेशनमार्फत १९ जना पदाधिकारी, ३०१ जना केन्द्रीय सदस्य तथा केन्द्रीय निकायका पदाधिकारीसहित कुल ३५१ जनाको नयाँ नेतृत्व चयन गरिँदैछ ।

चुनावी प्रतिस्पर्धामा अध्यक्ष केपी शर्मा ओली र वरिष्ठ उपाध्यक्ष ईश्वर पोखरेलले आ–आफ्नो प्यानल बनाएर प्रतिस्पर्धा गरेका छन् । दुवै पक्षबाट गरी करिब ७ सयभन्दा बढी उम्मेदवार चुनावी मैदानमा छन् ।

प्राविधिक पाण्डेका अनुसार मतदानस्थलमा ८० वटा भोटिङ मेशिन राखिएका छन् । एक जना प्रतिनिधिले मतदान गर्न औसतमा ३५ देखि ४० मिनेट समय लाग्ने उनले बताए ।

उनका अनुसार साक्षर प्रतिनिधिले उम्मेदवार चिन्न सजिलो भएकाले छिटो मतदान गर्न सक्छन् । तर उम्मेदवार नचिनेका वा साक्षरता कमजोर भएका प्रतिनिधिलाई बढी समय लाग्ने अनुभव छ । पढेका र उम्मेदवारलाई राम्ररी चिनेका प्रतिनिधिले २० मिनेटमै मतदान सक्न सक्छन् भने ढिला गर्नेले ४० देखि ४५ मिनेटसम्म समय लिने गरेका छन् ।

मतदानमा समय लाग्नुको मुख्य कारण उम्मेदवारको संख्या धेरै हुनु र सबै उम्मेदवारको नाम पढ्नुपर्ने भएको पाण्डेले बताए । भोटिङ मेशिनमा उम्मेदवारको फोटो देखिए पनि प्यानल छुट्टै नआउने भएकाले मतदान प्रक्रिया लामो हुने उनको भनाइ छ ।

८० वटा मेशिनमा एकै पटक मतदान गर्दा करिब ४० मिनेटमा ८० जनाले मतदान गर्न सक्ने भएकाले सम्पूर्ण मतदान प्रक्रिया सकिन कम्तीमा १८ घण्टा लाग्ने अनुमान गरिएको छ । विभिन्न कारणले मतदान बीचमा रोकिन सक्ने भएकाले २० देखि २४ घण्टाभित्र मतदान सम्पन्न हुने उनले बताए ।

मतदान सकिएलगत्तै मतगणना सुरु हुनेछ । भोटिङ मेशिनले तत्कालै परिणाम दिने भए पनि सबै मेशिनबीच नेटवर्किङ नभएकाले प्रत्येक मेशिनको मत छुट्टाछुट्टै सङ्कलन गर्नुपर्ने हुन्छ । सबै मेशिनको मत जोडेर अन्तिम परिणाम सार्वजनिक गर्न डेढदेखि तीन घण्टासम्म लाग्ने पाण्डेले जानकारी दिए ।

उनका अनुसार नेतृत्वबाट कुनै अवरोध नआए आज रातभरमै मतदान सकिने र भोलि दिउँसोसम्म अन्तिम परिणाम सार्वजनिक हुने अपेक्षा गरिएको छ ।