खोज

काठमान्डौ, १ पुष ।

जेनजी आन्दोलनकी अगुवा तनुजा पाण्डेले आफूलाई जेनजीको प्रतिनिधि दाबी गर्ने सुदन गुरुङलाई आन्दोलनको नाम दुरुपयोग नगर्न कडा चेतावनी दिएकी छन् । सामाजिक सञ्जालमार्फत प्रतिक्रिया जनाउँदै पाण्डेले नेपाल कसैको ‘प्रयोगशाला’ नभएको स्पष्ट गर्दै गैरजिम्मेवार अभिव्यक्ति र गतिविधि बन्द गर्न आग्रह गरेकी हुन् ।

पाण्डेले सामाजिक सञ्जालमा लेखेकी छन्, “राजनीतिमा राजनीतिक चेतना किन आवश्यक हुन्छ भन्ने कुरा ‘जेठो छोरो’लाई हेरेर नै आँकलन गर्न सकिन्छ । अत्यधिक पुलपुलिएको व्यवहारले आन्दोलनलाई नै कमजोर बनाउँछ ।” उनले माग पूरा नभए जेनजी आन्दोलन ‘फेल’ हुन्छ भन्ने कथ्य जबरजस्ती थोपरिनु गलत भएको उल्लेख गर्दै यस्तो प्रदर्शनमुखी रवैया लज्जास्पद भएको टिप्पणी गरेकी छन् । निष्पक्षताको अपेक्षा गर्नेले सर्वप्रथम आफैँबाट त्यो संस्कार सुरु गर्नुपर्ने उनको भनाइ छ ।

सुदन गुरुङलाई प्रधानमन्त्री सुशीला कार्कीको ‘जेठो छोरो’को संज्ञा दिँदै पाण्डेले उनले समय–समयमा विरोधाभासपूर्ण अभिव्यक्ति दिँदै आएको आरोप लगाएकी छन् । “कहिले नेताहरूलाई निर्वाचनमा आउन नदिने घोषणा गर्ने, कहिले राजनीतिक दल नै आवश्यक छैन भन्ने, अनि फेरि बहुदलीय लोकतन्त्रको वकालत गर्ने तर तिनै दलहरूलाई बेवास्ता गर्दै एकपक्षीय सम्झौता गर्ने—यस्ता विरोधाभास राजनीति होइन, असंगत नाटक हुन्,” पाण्डेले लेखेकी छन् ।

उनले अरूको आलोचना गर्नुभन्दा पहिले आफ्नै व्यवहारमाथि आत्म-विश्लेषण गर्न गुरुङलाई सुझाव दिएकी छन् । पछिल्ला तीन महिनामा उनका अस्थिर र असंगत कदमले देश र आन्दोलनलाई क्षति पुर्‍याएको दाबी गर्दै पाण्डेले संसद् भत्काउने र पुनःस्थापना गर्ने, कहिले चुनाव गर्ने त कहिले नगर्ने जस्ता मनपरी निर्णय अस्वीकार्य भएको उल्लेख गरेकी छन् ।

“खबरदार, नेपाल कसैको प्रयोगशाला होइन,” भन्दै उनले व्यक्तिगत एजेन्डा अघि सार्न सहिद र जेनजी आन्दोलनको नाम बेच्ने काम तत्काल बन्द गर्न आग्रह गरेकी छन् । ७० प्रतिशत सिट माग्ने व्यक्तिले त्यसको गम्भीरता बुझ्नुपर्ने उल्लेख गर्दै नैतिक, व्यवहारिक र निरन्तरशील हुनुपर्नेमा पनि उनले जोड दिएकी छन् । अरूमा क्षमता खोजिरहँदा आफ्नै क्षमता नहेर्नु पाखण्ड भएको र यसले राजनीतिक नैतिकतामाथि प्रश्न उठाउने उनको टिप्पणी छ ।

पाण्डेले अन्त्यमा गुरुङलाई केही समय विश्राम लिन सुझाव दिँदै आफ्नो दक्षताको क्षेत्रमा केन्द्रित हुन आग्रह गरेकी छन् । गम्भीर राजनीतिक विषयमा जिम्मेवारीबिनाका टिप्पणीहरू देशको शान्ति र स्थायित्वका लागि चिन्ताजनक बन्दै गएको उनको निष्कर्ष छ ।