खोज

काठमान्डौ, २९ मंसिर ।

गृहमन्त्री ओमप्रकाश अर्यालले वर्तमान सरकारको प्रमुख कार्यभार नै निर्वाचन सम्पन्न गर्नु रहेको स्पष्ट पार्दै निर्वाचनबाट भाग्ने वा चुनाव हुँदैन भन्ने अफवाह फैलाउनु न्यायोचित नभएको बताएका छन् ।

सोमबार पोखरामा आयोजित गण्डकी प्रदेशस्तरीय सुरक्षा बैठकलाई सम्बोधन गर्दै गृहमन्त्री अर्यालले यो सरकार निर्वाचनबाट निर्वाचित सरकारलाई सत्ता हस्तान्तरण गर्ने उद्देश्यसहित गठन भएकाले तोकिएकै मितिमा निर्वाचन गराउन दृढ रहेको बताए ।

उनले लोकतन्त्रको अभिन्न अङ्गका रूपमा विधिको शासन र स्वतन्त्र, निष्पक्ष तथा धाँधलीरहित निर्वाचनलाई उल्लेख गर्दै निर्वाचनप्रति अनावश्यक आशङ्का फैलाउने र सुशासनलाई कमजोर बनाउने गतिविधि स्वीकार्य नहुने धारणा राखे ।

‘लोकतन्त्रको आधार विधिको शासन र निष्पक्ष निर्वाचन हो,’ उनले भने, ‘निर्वाचन हुँदैन भनेर अफवाह फैलाउने वा निर्वाचनबाट भाग्ने प्रयास गर्नु उचित हुँदैन । सरकार निर्वाचन गराउन दृढताका साथ अघि बढेको छ ।’

गृहमन्त्री अर्यालले लुटिएका हतियार र फरार कैदीबन्दीलाई वर्तमान प्रमुख सुरक्षा चुनौतीका रूपमा पहिचान गरिएको उल्लेख गर्दै त्यसको समाधानका लागि सरकार जिम्मेवार ढङ्गले क्रियाशील रहेको बताए ।

‘लुटिएका हतियार र फरार कैदीबन्दी सुरक्षा चुनौतीका रूपमा रहेका छन्,’ उनले भने, ‘यस विषयमा सरकार वार्ता, संवाद र छलफलका लागि खुला छ । लुटिएका हतियार बरामद गर्न गृह मन्त्रालयले विशेष अपरेसन सञ्चालन गरिरहेको छ ।’

उनका अनुसार फरार कैदीबन्दीमध्ये करिब ७० प्रतिशत फिर्ता भइसकेका छन् भने बाँकी पनि क्रमशः फिर्ता हुने प्रक्रियामा छन् ।

गृहमन्त्री अर्यालले आगामी फागुन २१ गतेका लागि तोकिएको निर्वाचन शान्तिपूर्ण, निष्पक्ष र भयरहित वातावरणमा सम्पन्न गर्न सरकार दृढ रहेको दोहोर्‍याउँदै निर्वाचन निर्धारित मितिमै हुने स्पष्ट पारे ।

‘निर्धारित मितिमा निर्वाचन सम्पन्न गर्न नेपाल सरकार पूर्ण रूपमा प्रतिबद्ध छ,’ उनले भने, ‘स्वतन्त्र, निष्पक्ष र भयरहित वातावरणमा निर्वाचन गराउन आवश्यक कार्यविधि तयार भइसकेको छ र कार्यान्वयनमा ल्याइएको छ ।’

प्रदेशस्तरीय सुरक्षा गोष्ठीको उद्देश्य शान्ति–सुरक्षाका चुनौतीको विश्लेषण, आवश्यक तयारी तथा निर्वाचनको तयारीका विषयमा खुला छलफल गरी निष्कर्षमा पुग्नु रहेको उल्लेख गर्दै उनले निर्वाचन सफल बनाउन प्रदेश सरकारको समेत महत्वपूर्ण भूमिका रहने भएकाले आवश्यक सहयोग गर्न आग्रह गरे ।