खोज

बुटवल ।

रुपन्देही उद्योग संघले पुस ३ गतेदेखि १७ गतेसम्म बुटवलस्थित मण्डमको राष्ट्रिय औद्योगिक प्रदर्शनी स्थलमा आयोजना गर्न लागेको १६ औँ राष्ट्रिय औद्योगिक प्रदर्शनी, कृषि, प्रविधि तथा पर्यटन महोत्सव को सुरक्षालाई प्रभावकारी बनाउनु पर्नेमा सरोकारवाला पक्षले जोड दिएका छन् । सुरक्षा व्यवस्थापनमा विशेष ध्यान दिँदै आयोजकलाई आवश्यक सहयोग र समन्वय गर्ने प्रतिबद्धता पनि उनीहरूले व्यक्त गरेका छन् ।

सोमबार प्रदर्शनी स्थलमै आयोजना गरिएको छलफल कार्यक्रममा यस क्षेत्रका सुरक्षा निकायका प्रमुख, विभिन्न उद्योग–व्यवसायसँग आबद्ध संघसंस्थाका नेतृत्व तथा सुरक्षा व्यवस्थापन उपसमितिका सदस्यहरूको सहभागिता रहेको थियो । छलफलमा सहभागीहरूले प्रदर्शनी तथा महोत्सवमा विभिन्न उद्देश्य र स्वार्थ राखेर आउने व्यक्तिहरूप्रति विशेष सतर्कता अपनाउनुपर्ने, आयोजकबाट तयार गरिने सुरक्षा संयन्त्रलाई थप प्रभावकारी बनाउनु पर्ने तथा सुरक्षा निकायबाट आवश्यक निगरानी र सतर्कता अपनाएर कार्यक्रमलाई सफल बनाउनुपर्ने सुझाव दिएका छन् ।

कार्यक्रममा आयोजक समितिका अध्यक्ष कृष्णप्रसाद पराजुलीले सरोकारवालाबाट प्राप्त सुझाव र सल्लाहका आधारमा सुरक्षा व्यवस्थापनलाई अझ सुदृढ बनाउँदै कार्यक्रम अघि बढाइने जानकारी दिए ।

संघका द्वितीय उपाध्यक्ष तथा सुरक्षा व्यवस्थापन उपसमितिका संयोजक युवराज आचार्यले आयोजक पक्षबाट तयार गरिएको सुरक्षा व्यवस्थासँगै सरकारी सुरक्षा निकायको समन्वयमा विस्तृत सुरक्षा योजना बनाइएको बताए । उनले अनुभवी व्यक्तिहरूसँग निरन्तर परामर्श र सुझाव लिँदै सुरक्षा व्यवस्थालाई थप चुस्त बनाइने पनि जानकारी दिए ।

छलफल कार्यक्रममा इलाका प्रशासन कार्यालय बुटवलका प्रमुख श्रीनाथ पौडेल, इलाका प्रहरी कार्यालय बुटवलका प्रमुख इन्द्रबहादुर राना, सशस्त्र प्रहरी बलका चन्द्रमणि पौडेल, प्रहरी निरीक्षक डम्बरदेव गिरी, नेपाल उद्योग परिसंघ लुम्बिनी प्रदेशका अध्यक्ष एजाज आलम, चेम्बर अफ कमर्श लुम्बिनीका अध्यक्ष टंक पोखरेल, रुपन्देही उद्योग संघका पूर्व अध्यक्ष माधव पौडेल, निवर्तमान अध्यक्ष दिलिप सापकोटा तथा उद्योगी भूपालकुमार श्रेष्ठलगायतले लामो समयदेखि आयोजित प्रदर्शनीहरूको अनुभवका आधारमा अपनाइएका प्रभावकारी सुरक्षा रणनीति अवलम्बन गर्न सुझाव दिएका थिए ।

प्रदर्शनी सफलतापूर्वक सम्पन्न गर्न संघका अध्यक्षको संयोजकत्वमा १०१ सदस्यीय मूल समिति, ५१ सदस्यीय विशेष सल्लाहकार समिति, २५१ सदस्यीय सल्लाहकार समिति गठन गरिएको छ । साथै, निवर्तमान अध्यक्षको संयोजनमा विशेष मूल्याङ्कन समिति र ३० वटा विभिन्न उपसमितिहरू क्रियाशील रहेका छन् ।

भर्खरै निर्माण सम्पन्न भएको आधुनिक अन्तर्राष्ट्रिय प्रदर्शनी केन्द्रमा आधुनिक स्तरका स्टलहरू निर्माण गरिनेछ । स्टलको सजावटदेखि व्यवस्थापनसम्मलाई फरक र आकर्षक बनाइने तथा स्वदेशी उत्पादनलाई मात्र प्राथमिकता दिइने गरी दर्ता हुने स्टलहरूका लागि कडा मापदण्ड तय गरिएको संघले जनाएको छ ।

हाल स्टल निर्माणको काम अन्तिम चरणमा पुगेको छ भने महोत्सवको प्रचार–प्रसार पनि तीव्र रूपमा अघि बढिरहेको प्रचार संयोजक ई. किरण खरेलले जानकारी दिए ।