खोज

बुटवल, २७ मंसिर । 

पश्चिम नेपाल यातायात बहुउद्देश्यीय सहकारी संस्था ली.को पाँचौँ वार्षिक साधारण सभा तथा दोस्रो अधिवेशन बुटवलमा सम्पन्न भएको छ । यातायात व्यवसायी र मजदुरको हित र संरक्षण गर्ने उद्देश्यसहित बि.सं .२०७८ सालमा सो सहकारी संस्थाले स्थापनाको छोटो अवधिमा ३३ सय भन्दा बढी शेयर सदस्य र ९ करोड भन्दा बढीको आर्थिक कारोबार गर्न सफल भएको छ ।

कार्यक्रममा वार्षिक प्रतिवेदन प्रस्तुत गर्दै संस्थाका अध्यक्ष दधिराम खरेलले कार्तिक मसान्तसम्म १ करोड ६६ लाख १७ हजार २०० रुपैयाँ शेयर पुँजी र ७ करोड २४ लाख ९७ हजार ३६७ निक्षेप सङ्कलन गरेको बताए । साथै समीक्षा अवधिमा संस्थाले आर्जन गरेको ब्याजसमेत कुल पुँजी ९ करोड ६२ लाख ९७ हजार १८१ रुपैयाँ रहेको जानकारी गराए । बस व्यवसायी र यातायात मजदुरले जीवनको उत्तरार्धमा आर्थिक विपन्नताको सिकार हुन नपरोस् भनेर सहकारी संस्था स्थापना गरिएको अध्यक्ष खरेलको भनाई छ ।

पश्चिम नेपाल बस व्यवसायी सङ्घका पूर्व अध्यक्ष तुलसीराम बन्जाडेले यातायात व्यवसायी र मजदुरका परिवारको सामाजिक सुरक्षा लगायतका हकहित संरक्षण र आर्थिक योगदान पुराउने उद्देश्यले सहकारी स्थापना गरिएको बताए ।

पश्चिम नेपाल बस व्यवसायी प्रा.ली.का प्रबन्ध सञ्चालक रामचन्द्र भुसालले शेयर सदस्यको जीवनमा कुनै पनि प्रकारको दुर्घटना भई निधन भएमा वा घाइते भई काम गर्न नसक्ने भएको अवस्थामा सहकारीले निजको परिवारका लागि राहतको एउटा महत्त्वपूर्ण आधार बन्ने विश्वास भुसालले व्यक्त गरेका थिए ।

संस्थाका सचिव जितेन्द्र खत्रीले शेयर सदस्यहरूको हितमा नाफामुखी व्यवसाय प्रवर्द्धन गर्दै बहुउद्देश्यीय परियोजनाहरू सञ्चालन गर्ने जमर्को समेत गरिएको उल्लेख गरे । उनले सहकारीको सिद्धान्त र भावना समेट्दै आयआर्जन पनि बढाउँदै लैजाने खालका परियोजना सञ्चालन गरिने जानकारी गराएका छन् ।

सो अवसरमा निर्वाचन समितिको तर्फबाट मोहन पिएस, यातायात मजदुर सङ्घ सङ्गठनका तर्फबाट कृष्ण कंडेल, महिला शेयर सदस्य राधिका सिग्देल, प्रा।ली।का कर्मचारी मधुसुधन अधिकारी लगायतले यातायात व्यवसायी, मजदुर र कर्मचारीका समस्या तथा समाधानका उपायहरू बारे चर्चा गरेका थिए । संस्थाले समीक्षा अवधिमा ४ जना यातायात व्यवसायी, मजदुर र कर्मचारीको निधन पश्चात् परिवारलाई १५ देखि २२ लाखसम्म राहत रकम उपलब्ध गराइसकेको छ ।

यसैबिच सम्पन्न अधिवेशनबाट संस्थाको अध्यक्षमा दधिराम खरेल पुनः सर्वसम्मत रूपमा चयन भएका छन् । उपाध्यक्षमा जिवनकुमार बन्जाडे, सचिवमा जितेन्द्र खत्री, कोषाध्यक्षमा नारायण भण्डारी पनि सर्वसम्मत चयन भएको निर्वाचन समितिका सदस्य कृष्ण प्रसाद भट्टराईले बताए । साथै सदस्यहरूमा मन्जु बस्नेत क्षेत्री, कृष्ण प्रसाद न्यौपाने, राजेन्द्रकुमार पौडेल, बिष्णु प्रसाद पाण्डे, खुमा अधिकारी पनि सर्वसम्मत चयन भएका छन् । यस्तै लेखा समिति संयोजकमा संजयकुमार मुडभरी, सदस्यहरु रन्जित खनाल र मिना भट्टराई ढकाल सर्वसम्मत निर्वाचित भएका छन् ।