खोज

काठमान्डौ, २५ मंसिर ।

स्वास्थ्य तथा जनसंख्यामन्त्री डा. सुधा गौतमले नेपालमा दिगो स्वास्थ्य बीमाको प्रभावकारी व्यवस्था अझै स्थापित नभएको बताएकी छन् । बिहीबार काठमाडौंमा आयोजित एक कार्यक्रममा सम्बोधन गर्दै उनले देशभरका स्वास्थ्य सेवा संरचनामा सुधार र व्यवस्थापनमा ध्यान दिन आवश्यक रहेको उल्लेख गरिन् ।

उनका अनुसार आधारभूत स्वास्थ्य सेवाहरू स्थानीय तहबाट नै सहज रूपमा उपलब्ध हुनुपर्ने हो । तर जाने–नजानेर साधारण उपचारका लागि पनि सेवा–ग्राहीहरू ठूला अस्पतालमा आउँदा ती अस्पतालहरूमा अनावश्यक भीड बढ्ने गरेको छ ।

विशिष्ट सेवा प्रदान गर्नुपर्ने ठूला अस्पतालहरू साधारण सेवा दिन बाध्य हुँदा स्वास्थ्यकर्मीमाथि कामको चाप बढ्ने तथा औषधि अभावजस्ता समस्या देखिने मन्त्री गौतमको भनाइ छ ।

बीमाप्रति आम नागरिक तथा बीमा बोर्डकै बुझाइ कमजोर रहेको उल्लेख गर्दै मन्त्री गौतमले स्वास्थ्य बीमाबारे स्पष्टता बढाउनुपर्ने आवश्यकता औंल्याइन् । अस्पतालमा थुप्रिँदै गएको चाप कम गर्न तथा स्वास्थ्य बीमालाई लक्षित समुदायसम्म प्रभावकारी रूपमा पुर्‍याउन सरकार गम्भीर भएर अघि बढिरहेको उनले बताइन् ।

उनले भनिन्, “आधारभूत स्वास्थ्य सेवाहरू स्थानीय तहमै मजबुत रूपमा सञ्चालन गरौँ । बीमाबारे नागरिक, अस्पताल र बीमा बोर्ड सबैमा पर्याप्त बुझाइ नहुँदा अस्पतालमा चाप बढेको छ । अब बीमालाई कसरी प्रभावकारी बनाउने र लक्षित समूहसम्म पुर्‍याउने भन्ने दिशामा हामी अघि बढिरहेका छौँ ।”

मन्त्री गौतमले लुम्बिनी, मधेश, सुदूरपश्चिम र कर्णाली प्रदेशमा मातृ–शिशु मृत्युदर उच्च रहेको बताउँदै ती क्षेत्रहरूलाई अत्यधिक प्राथमिकताका साथ कार्यक्रम सञ्चालन भइरहेको पनि स्पष्ट पारिन् ।