खोज

काठमान्डौ, २३ मंसिर ।

प्रधानमन्त्री सुशीला कार्कीले वर्तमान सरकार चुनावी व्यवस्थापनका लागि मात्र नभई सुशासन स्थापनाका उद्देश्यले गठन भएको बताएकी छन् । उनले भ्रष्टाचारविरुद्ध आवश्यक परे जुनसुकै हदसम्म कठोर कदम चाल्न सरकार तयार रहेको स्पष्ट संकेत दिइन् ।

भ्रष्टाचारविरुद्धको २२ औँ अन्तर्राष्ट्रिय दिवसको अवसरमा सिंहदरबारमा आयोजित विशेष समारोहलाई सम्बोधन गर्दै प्रधानमन्त्री कार्कीले जेनेजी आन्दोलनले उठाएको सुशासनको मागलाई सरकारले प्राथमिकतामा राख्दै तीव्र गतिमा काम गरिरहेको बताइन् ।

उनले भनिन्, “यो सरकार चुनावी मात्र होइन । सुशासनका माग र जेनेजी आन्दोलनको जगमा बनेको सरकार हो । नियमित कामसँगै सुशासन सुनिश्चितताका लागि सरकारले आक्रामक रूपमा अघि बढिरहेको छ ।”

प्रधानमन्त्रीका अनुसार भ्रष्टाचार नियन्त्रणका लागि राज्य संयन्त्रहरू सक्रिय भइसकेका छन् । “मागअनुसारका परिणाम आउन केही समय लाग्न सक्छ, तर भ्रष्टाचारविरुद्ध कठोरतम कदम चाल्न सरकार पछि हट्ने छैन,” उनले उल्लेख गरिन् ।

भ्रष्टाचारविरुद्ध काम गर्ने क्रममा धम्कीहरू आउने प्रसंग उठाउँदै प्रधानमन्त्री कार्कीले सरकार तथा जिम्मेवार पदाधिकारीहरू कुनै पनि दबाब वा चुनौतीबाट नडराई अघि बढ्ने दृढता व्यक्त गरिन् ।

“यस दिशामा उठाइएका कदमले अत्तालिएकाहरूले प्रत्यक्ष–परोक्ष धम्की दिने प्रयत्न गरेका छन्। तर हामी डराउँदैनौँ,” उनले भनिन् ।

प्रधानमन्त्री कार्कीले सम्बन्धित निकायका पदाधिकारी तथा कर्मचारीलाई व्यावसायिक स्वतन्त्रता र दायित्वका साथ विचलित नभई काम गर्न पनि आग्रह गरिन् ।