कतार, २३ मंसिर ।
कतार -गैरआवासीय नेपाली संघ,राष्ट्रिय समन्वय परिषद् कतारले नेपाली समुदायलाई लक्षित गरी निःशुल्क “स्वास्थ्य परीक्षण” अभियान कार्यक्रम गर्ने भएको छ।
नेपाली संघले एनआरएनए एनसिसी दिवसको अवसर पारेर नासिम मेडिकल सेन्टर सगंको समन्वयमा आगामी शुक्रवार “निशुल्क स्वास्थ्य परीक्षण”अभियान गर्न लागेको हो ।
संघका अनुसार स्वास्थ्य परीक्षण कार्यक्रममा विशेषज्ञ चिकित्सकहरूद्वारा रक्तचाप, सुगर, कोलेस्ट्रोल, BMI परीक्षण,सामान्य,दन्त परामर्श तथा आधारभूत स्वास्थ्य परीक्षणका साथै सामान्य चिकित्सकीय परामर्श प्रदान गरिने जानकारी दिएको छ ।
वैदेशिक रोजगारीको सिल-शिलामा कतारमा रहेका “हाम्रो समुदायका धेरै नेपाली श्रमिकहरूले स्वास्थ्य परीक्षणको अवसर नपाएर समस्यामा परिरहेका छन्। प्रवासको व्यस्त जीवनशैली र स्वास्थ्यमा ध्यान दिनु पर्ने समस्यालाई मध्यनजर गर्दै विशेष गरेर नेपाली श्रमिकहरूको अवस्थालाई ध्यानमा राख्दै श्रमिकहरूलाई प्राथमिक स्वास्थ्य जाँचको पहुँच उपलब्ध गराउनको लागी कार्यक्रमको आयोजना गरिएको गैर आवासीय नेपाली संघका अध्यक्ष कृष्ण पन्थीले बताए ।
निःशुल्क स्वास्थ्य परीक्षणमा कतारमा रहेका नेपाली श्रमिकहरू तथा सबै नेपालीलाई सहभागी हुन नेपाली संघका द्वितीय उपाध्यक्ष तथा श्रमिक विभागका संयोजक सन्तोष पौडेलले आग्रह गरेका छन्। पौडेलले कार्यक्रम निःशुल्क भएकाले विशेष गरी श्रमिकहरूलाई लाभ हुने अपेक्षा गरिएको बताउँछन् ।
शुक्रवार दोहाको सी रिङ रोडमा अवस्थित नासिम मेडिकल सेन्टरमा बिहान ७ बजे देखि १०:३० बजे सम्म समय रहेको छ । थप जानकारीको लागी एनसिसी कतारको हेल्प लाइन नम्बर ७०००१२५३ मा सम्पर्क गर्न सकिने आयोजक संस्थाले जानकारी दिएको छ ।
२३ मंसिर २०८२, मंगलवार
