खोज

काठमाडौँ ।

पूर्वमन्त्री जनार्दन शर्माको गृहजिल्ला रुकुम पश्चिममा तत्कालीन माओवादी केन्द्रले प्रयोग गर्दै आएका भौतिक संरचनाहरू औपचारिक रूपमा भागबण्डा गरिएको छ ।

जिल्लामा क्रियाशील नेपाली कम्युनिष्ट पार्टी (नेकपा) र प्रगतिशील लोकतान्त्रिक पार्टी (प्रलोपा) बीच सदरमुकामस्थित महत्त्वपूर्ण भवन तथा संरचनाहरू प्रयोग गर्ने सम्बन्धमा लिखित सहमतिसहित भागबण्डा गरिएको हो ।

शर्माले माओवादीसहितको एकता भएर नेकपा बन्दा त्यसतर्फ नगई प्रगतिशील लोकतान्त्रिक पार्टी गठन गरेका थिए । उनी प्रलोपाका संरक्षक हुन् ।

विगतमा एउटै पार्टीमा रहेर काम गरेको र भविष्यमा पनि सहकार्यको सम्भावना रहेको भन्दै दुवै पक्षले आइतबार सार्वजनिक सहमतिपत्रमार्फत सम्पत्ति बाँडफाँड गर्ने निर्णय गरेका छन् । सहमति पत्रमा नेकपा रुकुम पश्चिमका संयोजक गोविन्द रोका र प्रगतिशील लोकतान्त्रिक पार्टी रुकुम पश्चिमका संयोजक गोर्खबहादुर केसी ले हस्ताक्षर गरेका छन् ।

सहमति अनुसार मुसिकोट नगरपालिकाका दुई फरक स्थानमा रहेका भवनहरू दुई पार्टीले बाँडेर प्रयोग गर्नेछन् ।

मुसिकोट नगरपालिका वडा नं. ५, सेरिगाउँमा रहेको शहीद स्मृति प्रतिष्ठान र ईस्कन्द नर्मदा फाउण्डेशन परिसरभित्रका भवनसहितका सम्पूर्ण संरचनाहरू नेपाली कम्युनिष्ट पार्टीले प्रयोग गर्नेछन् ।

मुसिकोट नगरपालिका वडा नं. १, खलङ्गा बजारस्थित ईस्कन्द नर्मदा स्मृति फाउण्डेशनको नाममा रहेको भवन प्रगतिशील लोकतान्त्रिक पार्टीले प्रयोग गर्ने सहमति भएको छ ।

मंसिर १५ गते भएको उक्त सम्झौता मंसिर २१ गतेदेखि लागू भएको सहमति पत्रमा उल्लेख छ । पछिल्लो राजनीतिक ध्रुवीकरणसँगै भौतिक सम्पत्तिमा पनि स्पष्ट भागबण्डा भएको हो ।