खोज

काठमान्डौ, १९ मंसिर ।

नेपाल विद्युत प्राधिकरणले आफ्नो दीर्घकालीन रणनीतिअनुसार विद्युत प्रणालीलाई आधुनिक, स्मार्ट र स्वचालित बनाउन सुरु गरेको १३ वटा ग्रिड सबस्टेसनमध्ये सातवटा सबस्टेसन अब पूर्ण रूपमा स्वचालित प्रणालीमा सञ्चालनमा आएका छन् ।

सातवटा सबस्टेसन– पाँचखाल, बनेपा, पाटन, लैनचौर, बालाजु, चपली र भक्तपुर– अब काठमाडौंको मीनभवनस्थित प्राणिकरण भवनमा निर्माण गरिएको नयाँ नियन्त्रण कक्षबाट सञ्चालन हुनेछन् । यसले सबस्टेसनको स्वचालित सञ्चालन तथा वास्तविक समयमा निगरानी र नियन्त्रणलाई सहज बनाउने छ ।

बाँकी छ वटा सबस्टेसन– स्युइचाटार, टेकु, मातातीर्थ, चावहिल, के ३ र लामासाँघु– दुई महिनाभित्र स्वचालित प्रणालीमा आवद्ध गरिनेछ । स्वचालित सबस्टेसन स्युइचाटारस्थित भार प्रेषण केन्द्रसँग सुपरवाइजरी नियन्त्रण तथा डाटा प्राप्तिमार्फत जोडिने भएकाले एकीकृत प्रणाली अझ मजबुत र स्थिर हुनेछ ।

प्राधिकरणका कार्यकारी निर्देशक मनोज सिलवालका अनुसार स्वचालित प्रणाली पूर्ण रूपमा सञ्चालनमा आएपछि बारम्बार हुने विद्युत अवरोध न्यून हुने, भार व्यवस्थापन सहज हुने, सञ्चालन र मर्मत खर्च घट्ने, प्राविधिक क्षति कम हुने र स्मार्ट ग्रिड विकासमा सहयोग पुग्नेछ । उनले स्वचालित प्रणालीका कारण क्रमिक रूपमा सबस्टेसन मानवरहित रुपमा सञ्चालन हुने र कर्मचारी ड्युटीमा अनावश्यक खटाइ नहुने जानकारी दिएका छन् ।

सबस्टेसन स्वचालित बनाउनको लागि एसियाली विकास बैंक (एडीबी) को विद्युत प्रसारण तथा वितरण दक्षता सुदृढीकरण परियोजनाअन्तर्गत प्राप्त सहुलियतपूर्ण ऋण प्रयोग गरिएको हो । सम्पूर्ण आयोजनाको लागत करिब ६१ करोड रुपैयाँ रहेको छ ।