खोज

काठमान्डौ, १९ मंसिर ।

निर्वाचन आयोगले आगामी प्रतिनिधिसभा सदस्य चुनावको समानुपातिक निर्वाचन प्रणालीतर्फ भाग लिन इच्छुक राजनीतिक दलहरूलाई निवेदन पेस गर्न आह्वान गरेको छ ।

आयोगले शुक्रबार सूचना जारी गर्दै समानुपातिक प्रणालीसम्बन्धी निर्वाचन कार्यक्रम शनिबारदेखि शुरू हुने भएकाले स्वीकृत तालिकाअनुसार मंसिर २१ गते बिहान १० बजेबाट २३ गते अपराह्न ४ बजेसम्म निवेदन पेस गर्न सकिने जनाएको छ ।

आयोगले गत आइतबारदेखि समानुपातिक निर्वाचन प्रक्रिया मिलाउन कान्तिपथस्थित कार्यालयमा निर्वाचन अधिकृतको कार्यालय सञ्चालनमा ल्याइसकेको छ । यसका लागि आयोगका सचिव महादेव पन्थालाई निर्वाचन अधिकृत तोकिएको छ ।

आयोगले मंसिर २४ गते बिहान १० बजेदेखि अपराह्न ४ बजेसम्म निवेदन दर्ता गराएका राजनीतिक दलहरूको नामावली प्रकाशन गर्नेछ । त्यस्तै, आवेदन दर्ता गराएका दलले पुस १३ र १४ गते बिहान १० बजेबाट अपराह्न ४ बजेसम्म समानुपातिक उम्मेदवारको बन्दसूची पेश गर्नुपर्नेछ ।

आगामी फागुन २१ गते हुने प्रतिनिधिसभा निर्वाचनको मिति आउन अब ९० दिन मात्र बाँकी छ ।

प्रत्यक्षतर्फ (पहिलो हुने निर्वाचित हुने प्रणाली) का लागि माघ ६ गते उम्मेदवारको मनोनयनपत्र दर्ता गरिनेछ । सोही दिन उम्मेदवारहरूको प्रारम्भिक सूची प्रकाशन हुनेछ । माघ ७ गते मनोनयनविरुद्ध उजुरी दिने समय तोकिएको छ ।

माघ ८ गते उम्मेदवारको नामावली प्रकाशन गरिनेछ भने माघ ९ गते नाम फिर्ता लिने अन्तिम समय हुनेछ । सोही दिन अन्तिम नामावली प्रकाशित गरी उम्मेदवारलाई निर्वाचन चिन्ह प्रदान गरिने कार्यक्रम रहेको छ ।

आयोगले माघ ११ गतेका लागि तोकिएको राष्ट्रियसभा निर्वाचनको तयारी पनि एकसाथ अघि बढाइरहेको छ ।