खोज

लमही, १८ मङ्सिर ।

दाङको राजपुर गाउँपालिका–३ भैरहवाकी स्थायी बासिन्दा रक्षाकुमारी यादव २० वर्षको उमेरमै विद्यालयको नेतृत्व सम्हालेकी छिन् ।

उनी महिला र यादव समुदायमा प्रेरणादायी उदाहरण बनेकी छन् । घुम्टोमै जीवन यापन गर्ने मधेसी महिलाहरूका लागि उनी झनै हौसला बनेकी हुन् । बबई गाउँपालिका–७ जलजला मलाई दाङस्थित श्री सरस्वती आधारभूत विद्यालयमा उनले गत वर्षदेखि प्रधानाध्यापकको जिम्मेवारी सम्हाली रहेकी छन् ।

कम उमेरमै ठुलो जिम्मेवारी वहन गर्दै अघि बढेकी रक्षाकुमारीको लगनशीलता, दृढता र कार्यक्षमताको स्थानीय समुदायमा प्रशंसा भइरहेको छ । धरैले उनलाई ‘युवा नेतृत्वको उत्कृष्ट उदाहरण’ भन्दै बधाई तथा शुभकामना दिइरहेका छन् ।

“उमेर भन्दा जिम्मेवारी र दृष्टिको महत्व ठूलो हुन्छ,” रक्षाकुमारी भन्छिन्, “गाउँका बालबालिकालाई गुणस्तरयुक्त शिक्षा उपलब्ध गराउनु नै मरो पहिलो लक्ष्य हो ।”
प्रधानाध्यापकका रूपमा उनले विद्यालयमा प्राविधिक शिक्षा, बालमैत्री वातावरण निर्माण र शैक्षिक गुणस्तर सुधारलाई मुख्य प्राथमिकतामा राख्दै काम अघि बढाइरहेकी छन् ।

रक्षाकुमारीलाई कक्षा ६ देखि १२ सम्म अध्ययनका लागि क्रियटिङ पोसिबिलिटिज नेपालले विशेष सहयोग गरेको थियो । कम उमेरमै जिम्मेवारी र सफलताको शिखर चुमेकी उनलाई देखेर सिपी नेपाल परिवारले समेत धन्यवाद दिएको छ ।

गाउँमै बसेर युवतीले यसरी नेतृत्व सम्हाल्नु समुदायका लागि महत्वपूर्ण उपलब्धि मानिएको छ अभिभावक तथा स्थानीयवासीको भनाइ छ । सामुदायिक विद्यालयमा युवा नेतृत्व बढ्दै जाँदा शिक्षा क्षेत्रमा नयाँ ऊर्जा, नयाँ सोच र सकारात्मक परिवर्तन ल्याउने विश्वास बलियो हुँदै गएको छ ।

बिदेसिने युवालाई गाउँमै बस्ने र सेवा तथा नेतृत्वमार्फत योगदान दिन सकिने मार्ग देखाएको उदाहरणका रूपमा रक्षाकुमारीको यात्रा निकै प्रेरणादायी मानिएको छ ।