खोज

काठमान्डौ, १८ मंसिर ।

नागरिक बचाउ दलका संरक्षक दुर्गा प्रसाईंले देशमा वैदिक सनातन हिन्दु धर्म, राजसंस्था, प्रदेशको खारेजी र प्रत्यक्ष कार्यकारी प्रणालीसम्बन्धी विषयमा जनमत सङ्ग्रहको माग राखेका छन् । उनले यस कदमलाई ‘अन्तिम विकल्प’ भनेका छन्, यदि देशमा हिंसा वा लडाइँ रोक्न सकिएमा ।

प्रसाईंले जनमत सङ्ग्रहमार्फत देशलाई जोगाउने बाटो निर्माण गर्नु सबैको दायित्व भएको बताएका छन् । यसै सन्दर्भमा उनले गृहमन्त्री ओमप्रकाश अर्यालसँग छलफल भएको र गृहमन्त्रीले आफूहरूको मागप्रति सकारात्मक प्रतिक्रिया दिएको जानकारी दिएका छन् ।

उनका मागहरू नेपाल टुक्राउने खालका नभई राष्ट्रिय हितमै आधारित रहेको उनले स्पष्ट पारेका छन् । उक्त माग पूरा हुने सम्भावना ६० प्रतिशत रहेको प्रसाईंले विश्वास व्यक्त गरे । तर, सरकारले माग पूरा नगरेमा आन्दोलन नै अन्तिम विकल्प बन्ने चेतावनी उनले दिएका छन् ।

प्रसाईंले अन्तरिम सरकारले भ्रष्टाचार नियन्त्रणमा असफल रहेको र जेनजीको समर्थनमा बनेको सरकारले उल्टै उनीहरूलाई थुनेको आरोप समेत लगाएका छन् । उनले भने, “उहाँहरूले भ्रष्टाचारीलाई कारबाही गर्न सक्नुभएन । जुन जेनजीलाई टेकेर सरकारमा जानुभयो, अहिले त्यही जेनजीलाई नै थुनेको छ । सरकार उल्टो बाटोमा अघि बढिरहेको छ । जेनजी विद्रोहीलाई थुन्न नहुने हो ।”

प्रसाईंले राष्ट्र जोगाउने अभियानमा सबैलाई साथ दिन आह्वान समेत गरेका छन् ।