खोज

पाल्पा, १८ मंसिर

आगामी मंसिर २१ गते हुने प्रतिनिधि सभा निर्वाचनका लागि सरकार पक्षबाट घोषणा भएपछि पाल्पामा नयाँ पुस्ताका मतदाता उल्लेख्य रूपमा थपिएका छन्। निर्वाचनका लागि आवश्यक उमेर पुगेका ६ हजार ८ सय ८७ जना युवाले यसपालि मतदाता नामावलीमा आफ्नो नाम समावेश गराएका छन्।

भदौ २३ र २४ मा भएको ‘जेन्जी आन्दोलन’ पछि बनेको वर्तमान सरकारले फागुन २१ गतेदेखि लक्षित मतदाता नामावली संकलन प्रक्रिया सुरु गरेको थियो। राष्ट्रिय परिचयपत्रका आधारमा युवाहरूले ठूलो संख्यामा नाम दर्ता गराएका हुन्।

जिल्ला निर्वाचन कार्यालय पाल्पाका लेखा प्रमुख विनोद घिमीरेका अनुसार, अध्यादेशमार्फत नाम दर्ता खुला गरिएपछि कार्यालयमा नै उपस्थित भई १ हजार १७ पुरुष र ८ सय १० महिलाले नाम समावेश गराएका छन्।
यस्तै, २ सय ५९ पुरुष र ३ सय ७६ महिला अन्य जिल्ला बाट पाल्पामा बसाइँसराई गर्दै मतदाता पुनःदर्ताका लागि आएका छन्।

हाल कार्यालयले दर्ता भएकाहरूको विवरण रुजू तथा सच्याउने कार्य गरिरहेको घिमीरेले बताए। यो प्रक्रिया पूरा भएपछि मात्र नयाँ मतदाता नामावली सार्वजनिक गरिने उनले जानकारी दिए।

यसैबीच, दुईवटा संघीय र चारवटा प्रदेशसभा निर्वाचन क्षेत्र रहेको पाल्पामा यसअघि नै कायम रहेका ८१ वडाका १ सय १८ मतदान स्थललाई आगामी निर्वाचनमा पनि यथावत् राख्ने निर्णय गरिएको छ। निर्णय जिल्ला प्रशासन कार्यालयका सूचना अधिकारी तथा सहायक प्रमुख जिल्ला अधिकारी ऋषि राम सुवेदीले जानकारी दिएका हुन्।

सुरक्षा समितिका सदस्य, राजनीतिक दलका प्रतिनिधि तथा स्थानीय तहका जनप्रतिनिधिहरू सहभागी सर्वदलीय बैठकले मतदान स्थल यथावत् राख्ने निर्णय गरेको हो। भने, मतदान केन्द्रका विषयमा भने अझै छलफल जारी रहेको प्रशासनले जनाएको छ।