खोज

कपिलवस्तु, १७ मंसिर ।

बुद्धस्थल तिलौराकोट दरबार परिसरमा प्रायः भेटिने युट्युबमा भाइरल टुर गाइड राहुल मल्लाह (साहनी) बलात्कार आरोपमा पक्राउ परेका छन् ।

कपिलवस्तु नगरपालिका वडा नम्बर ३ शिवगढमा घर अधिकरणमा परे पछि हालै कपिलवस्तु नगरपालिका वडा नम्बर ६ तिलौरीमा बसाई सरेका २० वर्षीय राहुल मल्लाहलाई कपिलवस्तु प्रहरीले बलात्कार आरोपमा नियन्त्रणमा लिएको छ । कपिलवस्तु नगरपालिका वडा नं. ३ तिलौराकोट दरबारमा घुम्न गएकी एक १७ वर्षीय किशोरीलाई डर त्रास देखाई जबरजस्ती करणी गरेको आरोप उनी माथि लागेको छ ।

पिडित किशोरी आफ्नो भिनाजु नाता पर्ने व्यक्ति सँग तिलौराकोट दरबार घुम्न गएको बेला निज राहुलले निजका भिनाजु पर्ने व्यक्तिलाई विभिन्न आरोप लगाएर भगाए पछि डर त्रास देखाएर घटना घटाएका थिए । राहुलले डर त्रास देखाए पछि पिडित किशोरीलाई नजिकको झाडीमा लगेर करणी गरेको पीडितले प्रहरीमा बुझाएको जाहेरीमा उल्लेख छ ।

पिडित किशोरीले उनका बुवाको रोहवरमा दिएको जाहेरीका आधारमा राहुललाई नियन्त्रणमा लिई कपिलवस्तु अस्पतालबाट यौनजन्य शारीरिक जाँच गराई कपिलवस्तु अदालतमा पेस गरिएकोमा अदालतले अनुसन्धानका लागी ७ दिनको म्याद थप गरेको जिल्ला प्रहरी कार्यालय कपिलवस्तुका प्रवक्ता प्रहरी नायब उपरीक्षक रिपेन्द्र कुमार सिंहले जानकारी दिए ।

नेपाली, अङ्ग्रेजी सहितका अन्य भाषामा तिलौराकोट आउने पर्यटकलाई सहजीकरण गर्दै गाइडको काम गर्ने उनी ६ वर्ष अघि युट्युबरहरु भाग्य न्यौपाने र भोजराज थापालाई अन्तर्वार्ता दिए पछि एकाएक चर्चित बनेका थिए ।